2024-cü yılın Kasım ayın 27-dä Çadırdakı eni kurulan “Oyuncak” kukla teatrusu Çadır “Andrieş” 8-ci uşak başçasında seftä gösterdi gagauzça hazırladıı “Rız otu” kukla spektaklisini.
“Rız otu” kukla spektaklisini hazırlayan hem sțenaya koyan “Oyuncak” kukla teatrusu hem onun aktörları. Bu teatru Gagauziyada seftä kurulan bir teatru, angısını kurdu “Mirkiras” Cümne Asoțiațiyası hem angısı işleer Çadır primariyasının kanadı altında.
“Rız otu” pyesanın avtoru – gagauz dramaturgu Todur ZANET. Spektakliya muzıkayı yazdı kompozitor Födor GAYDARCI. Spektakli için hepsi kuklaları hem dekorațiyaları hazırladılar hem yaptılar ustalar, ani çalışêrlar Çadır kasabasının zanaat uçilişesindä.
“Oyuncak” kukla teatrusunun tarafından hazırlanan gagauzça kukla spektaklileri proektında lääzım toplan 4 pyesaya görä spektakli hazırlansın. Şindi teatru ikinci pyesadan tutundu.
Çadır primariyasınnan iş birliindä, “Oyuncak” kukla teatrusunun gagauz dilindä spektaklilär proektına arka oldudu Moldovada işbirliindä Şveyțariya bürosu (Swiss Cooperation in Moldova).