Eni Yıla karşı başarıldı remont Caltay küüyün «Золотой ключик» (“Altın anaktar”)uşak başçasının örtüsünä, iki yazlık odasına hem eşiklerinä. Bundan kaarä tertiplendi hepsi grupaların içerleri hem bir boş grupanın odalarında fizkultura zalı yapıldı.
Caltay küüyün «Золотой ключик» uşak başçası irmi sekiz yıl geeri, 1989-cu yılın Hederlez ayın (may) 9-da, açıldı. Ozaman da, şindi da, o uşakları bakmaa deyni en üüsek standartlara uygun oldu: iki katlı bina, aydınnık hem büük içerlär, tertipli, yazlık odalarınnan, kertikli hem gözäl örtüylän, aulda oynamak erlärlän.
Belliki, bu irmi sekiz yılın içindä, küüyün primariyasının yardımınnan hem işçilerimizin zaametinnän, uşak başçasında ufak-tefek, nicä var bir laf “kosmetiçeskiy”, remont yapılırdı, ama bölä büük enilinmäk saftä oldu. Bu enilenmenin en önemni işi oldu o, ani örtü enidän düzüldü, zerä yaamurlar yaadıkça sular tavana akardı. Remonttan sora bizim uşak başçamız genä enidän çalaşmaa başladı, burada genä aydınnık hem kuytulu, neyä zaametçilerimizlän bilä analarlan-bobalar hem uşaklar da sevinerlär.
Onuştan onnarın hem kendimizin adından bu remontta yardımnar için şükür ederiz Gagauziya İspolkomuna hem Halk Topluşuna, Başkana İrina VLAHa, küüyümüzdän deputata Natalya ŞOŞEVAya, primarımıza İlya KOŞULİNCKİYya. Saa olsunnar hepsi, kim uşakları düşüner hem kimin uşaklar için canı yanêr.
Uşak başçamızın açılma günündän bir ömür geçti. Onnar, kim bizä uşakkana gelärdi, büüdülär, da büün artık kendi uşaklarını burayı getirerlär. Onnar her sabaa görerlär, ani uşak başçamız enilendi, diişti, ama o sıcaklık hem cömertlik, ani burada bunca yıl var, yaşêêr hem yaşayacek. Da burada herkerä uşakların şen hem cıngırdaklı sesleri ötecek.
Caltay küüyün «Золотой ключик» uşak başçasısında çalışan insannarın adından saygıylan hem sevgiylän, Elena Nikolaevna STANEVA, uşak başçanın geçici direktoru.
