Kırım ayın (dekabri) 7-11 günnerindä Caltay küüyün «Золотой ключик» (“Altın anaktar”) uşak başçasında geçti oyun hem oyuncak aftası. Bu türlü afta burada her yılın yapıêr.
Oyun hem oyuncak aftasının ideyası – üzlärcä yıl elenän hem seçilän oyunnarı uşakların arasında ekmää hem bu oyunnara anaları-bobaları da katmaa. Onuştan oyun hem oyuncak aftasında teklif edildi analar-bobalar bu oyun dünnäsının bir parşası olsunnar da, uşak başçasının zaametçilerinnän bilä, uşaklarda oyunculuk hem yaratıcılık becerilkiinii zeedeletsinnär. Bu verdi kolayını analar-bobalar tanışsınnar eni oyun tehnologiyalarınnan hem oyun pedagogikasının metodikalarınnan.
Lääzım urgulamaa, ani uşak başçasında vakıt minut-minut yazılı. Ama oyun için zaman ayırılêr. Uşaklar kimär kerä kendileri da oynamaa başlêêrlar. Birisi alêr oyuncaa da, birazadana, görersiniz, ani o oyuna onun kafadarları da katılêr – da başlêêr büük oyun dünnäsının oyunu. O oyunda uşaklar dünneyi üürenerlär, kendilerinin erini orada bulêrlar.
Belli ki en çok oyunnar masallarlan hem masalların kahramannarınnan ilgili. Onnardan uşaklar en islää tarafları kavrêêrlar hem masalların kahramannarına benzemää savaşêrlar. Bundan kaarä oyunnar uşakların arasında kafadarlık duygularını kaavileştirer, kolektiv azası olmaa üüreder, yaptıklarına kantarlamak esabı yapmaa kolaylık verer.
Meraklı oyunnar verer kolayını uşakların keyfi erindä olsun, biraz da büüklerä benzesinnär.
Deyecez “Tükän” oyununu uşaklar pek beenerlär. Zengin fantaziyalarına görä uşaklar aklıyca istedii işleri istedii işlerä çevirerlär: fidan yapraklarını – paraya, taşları – makarinalara, h.t.b… da te onnar alıp satêrlar, satıp – alêrlar. Erleştirerlär mevaları hem zarzavatları, buyur ederlär datmaa.
Oyunnarda uşaklar mutlaka yaradêrlar, eni opbrazlar kurêrlar. Bu da verer kolayını onnar ilerki yaşamaya hazır olsunnar.
Elena Nikolevna STANEVA, Caltay küüyün «Золотой ключик» (“Altın anaktar”) uşak başçasının başı
