Canavar ayın (oktäbri) 22-dä Komrat kultura Evindä oldu “Can Dalgasında” I-ci gagauz êstrada yarışmanın 2-ci turu. Bu konkursta enseyip, genç türkücüyka Yuliya ARNAUT Gagauziyayı İstanbulda “Türkvizion-2016” temsil edecek.
“Can Dalgasında” êstrada yarışması yapıldı Gagauziya kultura hem turizma Upravleniyası tarafından, gagauz êstradasını genişletmää hem genç talantlara sţenaya yolu açmaa deyni.
Yarışmada pay aldılar: Dimitriy JELEZOGLU, Yuliya ARNAUT, İvan BABOV, İvan JELEZNIY, Mihail TELPİZ, Polina STEFOGLU, Olga PAŞALI, Anna ÇEBAN, Sergey İVANOV hem İvan UZUN.
Jürinin kararına görä bu yarışmada erlär bölä payedildi:
I-ci er – Yuliya ARNAUT türküylän “Kemençä” (laflar – Todur ZANET, muzıka – İlya FİLEV);
II-ci er – Polina STEFOGLU türküylän “Bana, bana” (laflar – Todur ZANET, muzıka – Oleg BAROLÜK);
III-cü er – İvan UZUN türküylän “Bucak” (laflar – Dimitri KARAÇOBAN, muzıka – Dimitri GAGAUZ).
Yarışmada jüri tarafından verildi birkaç maasuz ödül da:
“En islää sţena obrazı” – Polina STEFOGLU;
“En islää türkücü-poet” – Todur ZANET;
“En islää kompozitor” – İlya FİLEV.
“Can Dalgasında” êstrada yarışmasında pay alannarın becerikliini kantarlarkana, jüri esaba aldı katılannarın türkücülük ustalıını, ses uurlarını, repertuarın aarlıını, sţena kulturalarını.
Nicä açıkladı Gagauziya kultura hem turizma Upravleniyanın başı Vasilisa PETROVİÇ “bu konkurs adetä dönecek. Biz ileri dooru da toplaycez Gagauziyanın talantlarını hem kendilerini göstermää deyni onnara kolaylık verecez. Onnarı Moldovada hem aşırıda önä çıkaracez”.
PATRETLERDÄ:
“Can Dalgasında” êstrada yarışmasında pay alannar yakınnarınnan hem jüri azalarınnan.
Kompozitor İlya FİLEV, Gagauziyanın “Türkvizion-2016”da temsilciykası Yuliya ARNAUT, Gagauziyada “Türkvizion”un temsicisi Pötr PETKOVİÇ.
