Cumêrtesi, Çiçek ayın 24-dä, Kişinevun aeroportunda kondu Rusiyanın Üstolan Durumnarı Ministerliin eroplanı, insannık yardımı olarak, parasız getirip Moldovaya koronavirusa karşı 142 bin doza “Sputnik-V” vakținası, angısınnan bilä burayı geldilär Rusiya Dumasının deputatları Viktor SELİVERSTOVlan Artöm TUVAROV hem Moldova soțialistlär partiyasının başı İgor DODON.
Aeroportta eroplanı karşladılar Moldova Parlamentın spikerı Zinaida GREÇANAYA, Moldova Rusiya Büükelçisi Oleg VASNEȚOV hem Moldova saalık ministerliin devlet sekretari İgor KUROV.
Hem Moldova soțialistlär partiyasının başı İgor DODON, hem Moldova Parlamentın spikerı Zinaida GREÇANAYA şükür ettilär Rusiyaya bu yardım için.
Ayırıca İgor DODON şükür etti Rusiya Prezidentına Vladimir PUTİNä, angısının doorudan emirinnän bu iş yapılmış.
Moldova Prezidentı Maya SANDU da Facebookta bir yazıylan şükür etti Rus Federațiyasına bu verilän insannık yardımı için.
İgor DODON açıkları hem taa sora Rusiya Dışişleri Ministerliin temsilcisi Mariya ZAHAROVA da urguladı, ani Hederlez ayında Moldovaya, insannık yardımı olarak, Rusiyadan taa 40 bin doza “Sputnik-V” vakținası gelecek.
Taa sora Moldova soțialistlär partiyasının başı İgor DODON söledi, ani son minuda kadar Moldova kuvetleri tarafından bu “Sputnik-V” vakținasının gelmesinä kösteklär koyulmuş.
Patretlär: https://www.facebook.com/dodon.igor
