Biz artık bildirdiydik, ani bu yıl Kirez ayın (iyün) 4-dä Çöşmä küüyünä yaamurlan hem toluylan bilä büük bir bora urdu. Yımırta gibi tolular hem bakırdan yaamur Çöşmä küüyün yapılarına, aullarına hem tarlalarına büük zarar getirdiydi. O zararların arasında Çöşmä küüyü liţeyin örtüsünü da bora aldıydı.
Örtünün enidän yapılması için kendi yardımını Gagauziya İspolkomu uzattı. İspolkom 300 bin ley verdi. Kalan 600 bin leyi da koydu o firma, angısının beceriksizlik beterinä bu zarar oldu. Canavar ayın (oktäbri) 6-da, örtünün enidän kurulmasından sora, Çöşmä küüyü liţeyi genä açıldı. Bu iş için burayı geldilär Gagauziya Başkanı İrina VLAH hem Valkaneş rayonun başı Födor TERZİ. Liţeyin üürencileri Canabilerini çiçeklän karşladılar hem onnarlan barabar şiridi kestilär.
Liţeyin direktoru Evdokiya RİŞELÄN şükür etti hepsinä kim yardımcı oldu bu büük mecidä: başta Gagauziya Başkanı İrina VLAHa, Valkaneş rayonun başı Födor TERZİyä hem hepsinä kim omuzunu koydu bu lääzımnı hem faydalı işä.
