Canavar ayın (oktäbri) 7-dä Komratın Mihail ÇAKİR adına pedagogika kolecında oldu prezentaţiya Todur ZANETın “Benim bir kabaatsız kırılan GAGAUZ Halkıma REKVİEM” kiyadına.
Prezentaţiyayı hazırladılar kolecın gagauz dilindä üüredicileri Galina Dimitrievna SİRKELİ, Aleksandra Dimitrievna MARİNOVA, Anna Danilovna SUKMAN. Onnara yardımcı oldular kolecın bibliotekacısı Praskovya Dimitrievna KARA, kolecın direktor yardımcısı Elena İvanovna FİLEVA hem kolecın birinci kursun üürencileri.
“REKVİEM” kiyadın prezentaţiyası başladı sţenadan garip bir kemençä havasınnan (kemençedä çaldı kolecin muzıkada üüredicisi Natalya Stepanovna TOMAYLI), nedän sora, üürencilär okudular avtorunun “Aaçlık” peetini hem “REKVİEM” kiyadından kimi sözleri.
Sora kısa bir sözlän zalda bulunan insannara danıştı kolecın direktoru Mariya Dimitrievna TANASOVİÇ. Canabisi urguladı, ani kolecda artık çoktan adet oldu, ki yazıcılar kendi kiyatlarına burada prezentaţiya yapêrlar. Mariya Dimitrievnanın nasatından sora söz verildi “REKVİEM” kiyadın avtoruna.
Todur ZANET açıkladı, ani kolecın üüredicilerinnän barabar karar almışlar bu prezentaţiyayı eni bir biçimdä yapmaa: avtor okusun yaratmasını da ondan sora kiyat için söz sölemää isteyän insannar kendi fikirlerini açıklasınnar. Nedän sora da avtor, bölüm-bölüm okudu “REKVİEM” poemasını.
Bir saat irmi minut may dop-dolu kolecın aktorvıy zalında kimsey kıpırdamadı. Hepsi sesleycilär daldılar o kahırlı hem zulumnu olayların içinä, angıları annadılardı poemada. Çoyunun gözleri yaşlan doluydu. Avtor sa durgunmadaan, salt ikidä-birdä kısa remarka yapıp, geçirdi zalda bulunannarı 1941-ci yılın gagauzların Sibirä kaldırılmasından, 1944-cü yılın olayladından, 1946-47 kışı aaçlık genoţidindän, 1949 yılın gagauzların genä Sibirä kaldırılmasından.
Poemanın okuması bittiynän zalda bir çala sus taa uzandı. Sora gagauz dilindä üüredicilär hem kolecın üürencileri, biri-biri ardı söz alıp, açıkladılar kendi duygularını kiyat için, poemada annadılan işlär için hem avtor için. Teklif ettilär, ani bu kiyat mutlaka şkolalarda üürenmäk programasına koyulsun.
Not. Prezentaţiyanın başından sonuna kadar, zulum vakıtlara kurban olan insannarın canı için, sţenada mum yandı.
