Okuycularımız artık bilerlär, ani Türkmenistan Respublikasının Prezidentı Gurbangulı BERDIMUHAMEDOVun izininä görä Gagauziyanın Çöşmä küüyündä Türkmenistan Respublikası yapêr bir uşak başçası. Bu uşak başçası olacek Türkmenistandan Gagauziyaya baaşış.
Nicä bildirdilär Gagauziya öndercileri Çöşmä küüyün eni uşak başçasında düzmäk hem tertiplemäk işleri sonuna yaklaştılar da yakınnarda bu uşak başçasının açılışı olacek. Beklener, ani bu binanın kapularını uşaklara açmaa deyni Gagauziyaya geleceklär Türkmenistan Respublikasının Prezidentı Gurbangulı BERDIMUHAMEDOV hem Moldova Prezidentı da onnar barabar Çöşmä küüyün eni uşak başçasının açılış şiridini keseceklär.
Canavar ayın (oktäbri) 6-da, uşak başçasının hazırlıınnan ilgili olarak, Çöşmä küüyündä toplantı oldu. Toplantıda pay aldılar Gagauziya Başkanı İrina VLAH, Moldova Prezidentın danışmanı Vladimir ÇEBAN, Çöşmä küüyün primarı Pötr MACAR, Gagauziya İspolkom azaları, yapıyı düzän firma temsilcileri hem Valkaneş rayonun slujbaların temsilcileri, bildirdi Gagauziya Başkanın pres-slujbası.
Çöşmä küüyün eni uşak başçası esaplı 160 uşaa deyni. Ama küüyün primarı bildirdi, ani küüydä var 183 uşak, angıları 5 uşak başçasına gidärdilär. Şindi, küü primariyasının kararınnan, hepsi bu uşak başçaları kapanaceklar da uşaklar Türkmenistandan baaşış olan eni uşak başçasına gezeceklär.
