Orak ayın (iyül) 2-dä, açan Moldova Prezidentı Maya SANDU geldi Çadır kasabasına Gagauziya primarlar Asoțiațiyasına girän primarlarlan buluşmaa, onu artık uzun zaman orada beklärdi Gagauziya Başkanı İrina VLAH, angısını bu toplantıya primarlar çarmadıydılar.
Bilmeeriz ne sä devirildi mi bu dünneydä, osa yıldızlar mı tersinä dönmää başladılar, ama Gagauziya Başkanı İrina VLAH, ani Maya SANDUyu ne görmää ne da saymaa istäärdi, ne da Canabisini perzident seçilmesinnän kutlaardı (bak: http://anasozu.com/sanmayin-ani-bu-sada-bir-karinin-oburuna-kususu/) bu kerä, bir kabaatlı uşak gibi süzülärdi Çadır kasabanın primariyasının eşiklerin yanında da ne sa Moldova Prezidentına sölemää savaşardı. Bu diildi o hodul, azıtmış, birkimseyi tanımaa hem bilmää istämeyän İrina VLAH. Bu – o İrina VLAHın gölgesiydi.
Çadır kasabanın primariyasının eşiklerin önündä durarak, İrina VLAH, may sekiz aydan sora, aazından laflarını öttüreräk, nicä öttürerlär düdüü onnar, kim düdüktä çalmaa becermeer, diş arası kutladı Maya SANDUyu onun 2020-ci yılın Kasımın 10-da Moldova Prezidentı seçilmesinnän hem dedi, ani “iş beterinä bu toplantıya katılamêêr”, bu arada islää işideräk nicä Gagauziya primarlar Asoțiațiyasının başı hem Kıpçak küüyün primarı Oleg GARİZAN onun üzünä dedi, ki bu toplantıya onu hiç çaarmêêrlar da.
Nicä herkerä, kameraların önündä, Gagauziya Başkanı savaştı terbeeleri kendi elinä almaa da “küsmää” Moldova Prezidentına, ani Gagauziyada bölä buluşmayı seçmiş. Prezident Maya SANDU pek gözäl bir cuvaplan “urdu İrina VLAHın burnusuna”, deyeräk, ani şindi kendisini Gagauziya primarlar Asoțiațiyası burayı çardı da Gagauziya tarafından başka bir ofițial teklif gelirsä o Gagauziyaya genä gelecek.
İrina VLAH, genä kameralara işleyeräk, dedi, ani Moldovanın “Korunmak üüsek Sovetindä” prezidentı kutlamaa istärdi, ama kendisini orayı çaarmamışlar.
Neyä, İrina VLAHı “erinä oturdarak”, Prezident Maya SANDU genä incäbir cuvap verdi: “Korunmak üüsek Sovetindä biz korupțiyaylan düüşeriz hem regional soruşlarını incelämeeriz”.
İrina VLAHın tarafından bu dialog neydi acaba? İrina VLAHın tabannarı mı yanêr, ayakların altından toprak mı kayêr osa, fena tırmalamaktan öncä, tırnakların saklanması mı?
Bunun cuvabını tezdä görecez, açan dokuz gündän sora Moldovada Parlament şseçimneri geçecek. Şindilik sä pek gözäl bir komediyayı durmamayca siiredelim: https://www.youtube.com/watch?v=BZd1BprdVR0&t=1s.
Anaktar sözlär : Gagauziya
