Gagauziya Halk Topluşu presa serviçi açıklamasına görä, geçennerdä Gagauziya Halk Topluşu (GHT) Başı Valentin GAYDARCI tarafından GHT Başın danışmanı olan İvan BURGUCUyu iştän atılmasından sora, Harman ayın 13-dä GHT Başı Valentin GAYDARCI İvan BURGUCUnun erinä Kişinevdan getirilän bir polițiyacıyı Liviu BAZÜKu GHT Başın eni danışmanı yaprı hem onunnan GHT kolektivını hem aparadını tanıştırdı.
Düşünün, Gagauziyanın can eri hem zakonculuk yuvası olan Gagauziya Halk Topluşuna bizdän olmayan hem Gagauziyamıza hiç bir zaman izmet etmeyän bir erifi getirmää deyni, bezbelli, Valentin GAYDARCIda büük sebeplär var. O sebeplerin birisi dä, bekim, Gagauziyayı erindä tutan sincirin en kaavi ekini – yurusprudențiyayı – yufkaltmaa hem o ekin kopmasını kolaylaştırmaa.
Gagauziyanın kurucularından birisi olan hem Gagauziyaylan gagauz halkına ömürünü baaşlayan İvan BURGUCUyu, köpek gibi iştän atıp, onun erinä Kişinevdan bir polițiyacıyı diiştirmää Valentin GAYDARCInın ne insannık ne dä moral hakı yolktur. Bunu kimä yaltıklanak hem neyä görä yaptı, acaba? Bu işin cuvabını, şindilik, sade bir Allaa biler, ama sora herkezi üürenecek.
Gagauziyayı koruyan hem zakonnarı bilän İvan BURGUCU gibi bir büük yuristı bilmäm kimä diiştirmesinnän ortaya kesin çıktı, ani bu diil bir yannışlık, ama Gagauziyayı yok etmedä merkez kuvetkerä deyni MAASUZ yapılan bir POLİTİKALI adım. Eridir demää: Ey, Göktä Boba, saklı hem bilinmeyän yolların senin! Osaydı taa doorusu olacek bunun erinä bölä mi baarmaa: Ey, uzun kuyruklu, mındar, titsi hem kirli yolların senin!
Şindi bakın Gagauziyanın can erinä hem zakonculuk yuvasına kimi getirdilär: Liviu BAZÜK 2016-cı yıladan Moldovanın Milli İnspektoriat Polițiyasının (MİP) patrul brigadasının komandiriydi. Sora, 2016-cı yıldan beeri, ozamankı Moldova içişleri ministrusu Aleksandru JİZDANın emirinä görä, MİP Başı oldu. 2019-cu yılda Liviu BAZÜK bu iştän çıkarıldı da Genel İnspektoriat Polițiyasının audit bölümün başına geçirildi. Üç taraflı (Moldova, Pridnestrovye hem Rusiya) kurulan Birleşik kontrol Komisiyasında Moldova Respublikasının delegațiyasında ekspert işledi. İi uurda çalışmaları için Moldovanın III-cü gradta “Credinţă Patriei” ordenınnan ödüllendi.
Akademik hem poet Todur ZANET, Gagauz Millli Gimnanın avtoru
