Büük ayın 25-dä Gagauziyada vizitlan bulundular Franţiyanın Dış işleri Ministerstvosunun Rusiya hem Dou Evropa soruşları departamentın başı İzabel DUMONT hem Moldovada Franţiya Büükelçiliin işbirliindä hem kultura işlerindä birinci konsilier Jeremie PETİT.
Gagauziya başkanın ofiţial saytı bildirer, ani Mihail FORMUZALın Franţiyadan musaafirlärlän buluşmasında incelendi Gagauziyada kuvet organnarın çalışmasınnan hem onnarın merkez kuvet organnarın ilişikliinnän baalı olan soruşlar. Bundan kaarä lafedildi Gagauziyada cümne-politika durumu için da.
Gagauziya Halk Topluşunda İzabel DUMONT hem Jeremie PETİT buluştular GHT başın yardımcılarınnan Demyan KARASENİylän hem Aleksandr TARNAVSKİYlän.
Burada İzabel DUMONT açıkladı, ani Franţiya “işbirliinä hazır hem bu uurda teklifleri bekleer”.
GHT başın birinci yardımcısı Demyan KARASENİ annattı musaafirlerä Halk Toluşun çalışmaları için. Verdi bilgi avtonomiyanın hem Gagauz Respublikasının kurulmak istoriyası için, urgulayıp, ani avtonomiya moldovan hem gagauz politikacıların akıllı politikasına görä Moldova Parlamentında 68 seslän kabledildi.
GHT başın yardımcısı Aleksandr TARNAVSKİY musaafirlerä finans işleri için annattı, danışıp onnara yardımcı olsunnar kabletmää deyni Gagauziyaya adanmış o 5 milion Euroyu hem insannarın yaşamak kertiklerini üüseltmää deyni hazırlanan proektları aslıya çıkarmaa.
Buluşmada GHT başın yardımcıları urguladılar, ani Gagauziyada Evropa Fondlarına büük umut var, ama o Fondlardan gelän paraların hiç bir damnası da Gagauziyaya etişmeer.
Buluşmalarda iki taraf ta urguladı, ani umut var ileri dooru işbirlii uurunda genişlemelär olsun.
