2025-ci Orak ayın (iyül) 1-dä Moldovanın “Teleradio-Moldova” cümne kompaniyası açtı Gagauziyanın başkasabasında Komratta kendisinin “Radio Moldova Komrat” (gagauzça lääzım olsun – “Komrat Moldova Radiosu) regional stanțiyasını.
“Radio Moldova Komrat” stanțiyasının açılmasınnan ilgili olarak, Moldovanın “Teleradio-Moldova” cümne kompaniyası bildirdi, ani bu radioda 12 saat kendilerinin yarattıı gagauzça hem rusça 24 programası olaceymış. Onnarın arasında haberlär, kultura, üüredicilik hem şennemäk prıgramaları. Kalan vakıdı da “Raio Moldova” programalarına retransläțiya yapılaceymış.
“Radio Moldova Komrat” stanțiyasının Gagauziyanın başkasabasında Komratta açılması – islää hem sevindirici bir haber. Ama, biraz fasıl geler, ani bu radionun plakatında, gagauzçadan kaarä, angı dildä istärsän yazılar var. Gagauzçanın erinä dä Türkiye türkçesindä yazı yazmışlar. Plakatta, gagauzça “Seläm” lafın erinä Türkiye türkçesinin arab dilindän alınma “Merhaba” lafı yazılı. Bu stanțiyayı açannar gagauz dilini, acaba, Türkiye türkçesi dili mi sayêrlar? Böläseydi – büük yannışlıkları var, çünkü Gagauz Dili türk dillerinin ayırı hem KENDİ BAŞINA bir dilidir.
Şindilik “Radio Moldova Komrat” stanțiyasını var nicä seslemää Gagauziyanın Komrat dolaylarında 104,3 FM dalgasında, Valkaneş dolayında da – 105,6 FM dalgasında.
Akademik Todur ZANET, 6 tomnuk “Büük Gagauzça-Rusça Sözlük” yaratmanın avtoru
