2018-ci yılın Baba Marta ayın 15-dä Gagauziya Halk Topluşun (GHT) deputatları Elena KARAMİT (Avdarma küüyü), Ekaterina JEKOVA (Çöşmä küüyü) hem Mihail JELEZOGLU (Kiriyet küüyü) yaptılar bir brifing, neredä açıkladılar, ani hazırlamışlar hem vermişlär GHTya “Gagauz dilini taa geniştän kullanmak için” Zakon proektını (bak: http://halktoplushu.md/index.php/novosti/2137-prezentatsiya-zakonodatelnoj-initsiativy).
Gözäl gagauzçada deputatların üçü dä brifingta annattılar neçin nekadar tez lääzım kabletmää bu Zakonu. Söledilär nicä o işleyecek hem annattılar o faydalı hem lääzımnı kolaylıkları, ani açêr bu Zakon gagauz dilin işlenmesinä, korumasına hem kurtalmasına.
Deputatlar Elena KARAMİT, Ekaterina JEKOVA hem Mihail JELEZOGLU urguladılar, ani “Gagauz dilini taa geniştän kullanmak için” Zakon üzerindä altı ay işledilär da o Zakon gagauz dilinä olacek bir temel, angısına görä Gagauziyada kurulacek gagauz dili lafetmäk, kullanmak hem işletmmäk ortamı.
Deputatlar urguladılar, ani gagauz dilinin işletmesini lääzım olacek başlatmaa ondan, ani hepsi İspolkom azaları hem GHT deputatları lääzım olacek bilsinnär hem kullansınnar gagauz dilini ofiţial uurda. Aklınıza getireriz, ani Elena KARAMİT, Ekaterina JEKOVA hem Mihail JELEZOGLU bu işi başlattılar artık. Açıklayıp Büük ayın (yanvar) 19-da, ani o gündän beeri hem ötää dooru GHT toplantılarında sadä gagauzça lafedeceklär (bak: http://anasozu.com/ne-mutlu-caniniza-gagauz-milleti-arkanizda/).
Urgulêêrız, ani açan 23 yıl geeri kuruldu Gagauziya avtonomiyası, onun baş neetiydi hem uuruydu – gagauz dilin korunması hem yaşadılması! Ama sora bu unuduldu! Da te, şindi, bu üç girgin gagauz deputatıların çalışmasınnan o neetä hem uura enidän yol açıldı.
“Gagauz dilini taa geniştän kullanmak için” Zakonun proekt burada: http://halktoplushu.md/index.php/zakonodatelstvo-ato/proekty-zakonov/2136-o-rasshirenii-sfery-primeneniya-gagauzskogo-yazyka.
