Ceviz ayın (sentäbri) 7-dä Kongaz küüyün “GagauziyaLand” dinnenmä hem şennenmä parkında oldu “Gagauz Korafı – 2024” milli kultura festivali, neredä pay aldılar Gagauziyanın herbir küüyündän, Moldovanın Çimişli, Leova (Kolibabovka küüyü), Orhey, Taraklı rayonnarından hem Ukraynanın Bolgrad rayonun Kurçu küüyündän kultura zaametçileri hem kilimneri sevän insannar.
“Gagauz Korafı – 2024” milli kultura festivalin programasına görä orada gagauz hem başka milletlerin kilimnerinin sergileri düzennedi, evelki çiiz sandıkların hem bürüncük peşkirlerin sergisi yapıldı, halk ustaların hem el zanaatçıların mallarının hem el dokuma kilimnerin alış-veriş çarşısı kuruldu, gagauz gelinnerinin hem halk giyimnerinin gösterisi yapıldı, aşçılık hem milli imeklerin kufnesi yapıldı, uşaklarıa deyni şennenmäk meydannarı açıldı.
“Gagauz Korafı – 2024” milli kultura festivalin ofițial açılış sırasının önündä Gagauziyanın Semön POMETKO adına “Düz Ava” örnekli türkü hem oyun halk ansamblisi gözäl oyunnarınnan selämnadı insannarı.
Sora sțenadan, açılış nasaatını (bütünnä gagauzça!) yaptılar Gagauziyanın Başkankası Evgeniya GUȚUL hem Gagauziya Halk Topluşun Başı Dimitriy KONSTANTİNOV. Açılış nasaatlarınnan insannarın önündä peydalandılar Komrat hem Kaul episkopu ANATOLİY, Moldova Parlamentının deputatları Marina TAUBER hem Vasiliy BOLÄ, h. t. b.
Bunun ardına da Lidiya İvanovna TODİEVA önderciliindä olan Çadır kasabasının Uşak yaratmak Merkezin “L” adlı Modalar Teatrusunun kıvrak kızları eni kolekțiya kostümnarın defilesini yaptılar. Defiledä pek donaklı bir fistannan pay aldı Gagauziyanın Başkankası da.
Ofițial açılıştan sora üüsek musaafirlär “GagauziyaLand” dinnenmä hem şennenmä parkın meydannarında kurulan kilim sergilerini dolaştılar.
Festival büük bür konțetlän başarıldı. O konțerttä pay aldılar Gagauziyadan oyun hem türkü ansamblileri, uşak halk oyunnnarı kolektivları, artistlär hem solistlär.
Lääzım urgulamaa, ani “Gagauz Korafı – 2024” milli kultura festivalin bölä gözäl hazırlanmasında hem donaklanmasında Gagauziya kultura Upravleniyasının büük izmetleri hem zaametleri oldu.
