Canavar ayın 14-dä Gagauziyanın Regional Galereyasında geçti prezentațiya eni duan hem taa tipografiya boyasına kokan taazä bir gagauz folklor kiyadına – “Gagauz masalları: masaldan masala”, angısında pay aldılar Gagauziya kultura Upravleniyasının zaametçileri, gagauz dilindä üüredicilär hem terbiedicilär, bibliotekacılar hem başka kultura insannarı, studentlar hem üürencilär.
“Gagauz masalları: masaldan masala” kiyadın tanıtmasının başında, sırayı götürän Gagauziyanın anılmış incäzanaat insanı hem artistkası Elena DANACI, ilk sözü verdi bu gözäl kiyadı hazırlayana Akademik Todur ZANETä, angısı annattı bu yaratmanın hazırlanması için hem “Bürüncük” uşak teatrusundan Damir ÇERNİOGLUnun soruşlarına cuvap verdi.
Canabisi bildirdi, ani “Gagauz masalları: masaldan masala” kiyadı hazırlandı Gagauziya kultura Upravleniyasının başı Marina SEMÖNOVAnın teklifinä görä hem tiparlandı Gagauziyanın “Gagauz dilinin kullanmak sferasının genişledilmesi için” Zakonun ömürä geçirilmesi çerçevesindä. Gagauziyanın Regional Galereyasına bu kiyadın tanıtması için gelän insannara deyni, Todur ZANET açıkladı, ani içinä 29 masal alan hem bölä gözäl donaklı bu kiyadın temelindä en önemni eri kaplêêr gagauzların büük yazıcısı Nikolay BABOGLU tarafından hazırlanan iki kiyattan folklor: “Masallar” (1991 yıl) hem “Gagauz folkloru” (1969). Bundan kaarä burayı girdi masallar Valentin MOŞKOVun “Nareçiya Bessarabskih gagauzov” kiyadından (1904) hem Todur ZANETin “GAGAUZLUK: Kultura. Ruh. Adetlär” (2010) hem da “Gagauzların kayıp olan dilinin hem kultura adetlerinin Moldovada korunması” 1-ci kiyadından (2017) masallar. Donaklandı kiyat bizim anılmış olan en büük resimcimizin Dimitri SAVASTİNın resimnerinnän.
Todur ZANET candan-ürektän şükür etti “Gagauz masalları: masaldan masala” kiyadın düzeldicisinä (korektoruna) Natalya KİVELä hem kiyadın mizanpajını hem kabın dizaynasını yapan Marina DİMİTRİUya da.
Bundan sora tanıdılan kiyada girän iki masalı annadıldı. Çeşmäküü uşak başçasının terbiediciykası Svetlana MADJAR annattı masalı “Dädunun hem babunun evi”, Kongaz “Cızdırık” ansamblisindän Kseniya PANAİTOVA da annatı masalı “Padişahın oolu hem üç kızkardaş”.
Tanıtmanı bitkisindä söz verildi Gagauziya kultura Upravleniyasının başına Marina SEMÖNOVAya, angısı, şükür edäräk Todur ZANETä, ani büük zaamet koydu bu masal toplumu başa çıkarılsın deyni, dedi: “Bana deyni bu kiyat – diil sade bir baskı. Bu benim saygım dedelerä, ana dilinä, manimä, angısından başladı masala sevgimin özel istoriyası. Bän inanêrım, ani bu kiyat yardım edecek unutmamaa, kimiz biz, neredän geldik hem ne iş için lääzım koruyalım kendi folklorumuzu hem geçmişimizi”.
Prezentațiyanın sonunda Todur ZANET bu sırada hepsi pay alannara baaşladı bu gözäl kiyadı hem Canabilerinä onnarı imzaladı.
