2025-ci yılın Kasım ayın 9-da Komrat kasabasının baş meydanında yapıldı hem geçirildi “Gagauz şarap yortusu – 2025” sırası, angısına katıldılar Gagauziyaylan Moldovadan şarapçılar hem ona musaafir oldu binnärcä insan.
Bakmadaan ona, ani “Gagauz şarap yortusu – 2025” yortusu, nicä dä bıldır, nem hem çiskin havaya razgeldi, onu kutlamaa deyni Komrat meydanında kendi aullarını, sergilerini hem çadırlarını kurdular gagauziyanın irmi küüyündän hem kasabalarından insannar. Onnar yortuya gelän musaafirlerä becerikliklernnän kendi adetlerini, yortu sıralarını, oyunnarı hem türküleri, folklor olaylarını gösterdilär, tuz-ekmeklän karşladılar, milli imeklärlän hem mancalarlan ikram ettilär hem bir filcan şarap sürdülär.
“Gagauz şarap yortusu – 2025” yortusu açılışında aar musaafirlerin, Gagauziya öndercilerinin, deputatlarının, politikacıların, popazların hem başka insannarın önündä teatrulu bir gösteri yapıldı, angısında Gagauziyanın artistleri hem ansablileri şennik yaptılar. Bu gösteri zamanı “Düz Ava” ansamblisi sțenadan ustalıını gösterdi. Nicä dä öbür sıralarda, gösteri başarıldı meydanda dizili olan hepsi uşak hem büüklär ansamblilerin gagauz halk oyunnarı fleşmobunnan, neredä pay aldı 250-dän zeedä artist.
Fleşmobun ardından sțenada bulunan Gagauziya İspolkomu Predsedatelin birinci yardımcısı İlya UZUN hem Gagauziya Halk Topluşu Başın yardımcısı Georgiy LEYÇU hepsini kutladılar “Gagauz şarap yortusu – 2025” yortusunnan hem şarapçılara çeşitli nominațiyalarda ödüllär verdilär.
Yortunun ofițial açılışından sora sıranın aar musaafirleri dä, sıradan insannar da aulları gezdilär, şarap buyurdular hem konuklandılar, gagauz milli imeklerindän dattılar. Var nicä demää, ani bütün ürektän ikramnandılar. Yortu sürtüü boyunca, meydanda kurulan sțenadan biri-biri ardına hem hiç durmamayca Gagauziya artistleri musaafirlerä şefk ettilär.
Bir şüpesiz lääzım urgulamaa, ani “Gagauz şarap yortusu – 2025” yortusunun bölä gözäl hazırlanması hem olması için büük zaamet koydular Gagauziya kultura Upravleniyasının zaametçileri hem onun başı Marina SEMÖNOVA, hepsi o insannar, ansamblilär, artistlär, Kultura Evlerin işçileri, el ustaları, ani bütün kuvetlerini harcêêrlar gagauzların hem Gagauziyada yaşayan milletlerin kulturalarının korunmasına hem ilerlemesinä.
