Türkiyenin Yurtdışı Türklär hem Akraba Topluluklar Başkannıın (YTB) yardımınnan, “Gagauz Yeri Gökoğuzları Çanakkale’de” proektına görä, Gagauziyadan 90 kişilik bir grupa insan, üürencilär hem üüredicilär, pravitelstvo dışında kuruluşların temsilcileri, artistlär hem popazlar, Canavar ayın (oktäbri) 12-17 günnerindä Türkiyenin Çanakkale hem Edirne kasabalarında bulundu.
Nicä bildirdi Gagauziya tarafından bu proektı hazırlayan gazetacı Alla BÜK, bu grupanın içinä Ukraynadan gagauzlar da alınmış.
YTB bildirdi, ani programaya görä Gagauziyadan insannar gördülär I-ci dünnä cengindä Türkiyenın Çanakkale ensyeşin 100-cü yıldönümünü annatan erlärli hem muzeyleri. Tanıştılar
Çanakkale gubernatorluunnan hem primariyasınnan, “18 Mart” Universitetın üüredicilerinnän seminar yaptılar, incazanaat sıralarına katıldılar.
Çanakkaledän sora Gagauziyadan insannar YTB Trakiya koordinatorluunda bulundular da YTBnın yaptıklarınnan hem Tükiye Bursları hakında bilgi aldılar. Sora da Edirne “Deveci Han” kultura merkezindä incäzanaat programasında pay aldılar hem konţert gösterdilär.
Edirne kasabasında gagauzlar katıldılar “Tarihten Günümüze Edirne” konferenţiyasına. Tanıştılar yazıcıylan Yavuz Bülent BAKİLERlan hem onunnan dialogta bulundular. Taa sora da Edirne Valisi (gubernatoru) Dursun Ali ÇAHİNnän buluştular.
YTB bildirdi, ani Edirne kultura programasına görä, gagauz insannarı kasabanın istoriya hem kultura erlerinnän tanıştılar.
