Türkiyenin “Çiçek ayın 23-çü milli baamsızlık hem Uşaklar yortusu” (“23 Nisan Ulusal Egemenlik ve Çocuk Bayramı”) günnünnän ilgili olarak, Gagauziyanın Kultura upravleniyasının Başı Marina SEMÖNOVAnın başkannıında Gagauziyadan delegațiya Türkiyenin Samsun hem İstanbul kasabalarında olan yortulu sıralara katıldı.
İlktän, Çiçek ayın 19-25 günneri arası Samsunda olan “II-ci Türk dünnäsı uşak festivali” (“II-ci Türk Dünnyası Çocuk Festivali”), angısında 9 devlettän 113 genç artist pay aldılar, sora da Çiçek ayın 25 – Hederlez ayın 1 günnerindä, “Türk dünnäsı aaraştırma vakfı” kanadı altında İatanbulda geçän XXVI-cı Türk halkların Halklararası festivalin “Türk dünyası Çocuk şöleni”ndä, angısında 16 devlettän 250 genç artist hem 40 pedagog pay aldılar. Gagauziyayı bu yortulu sıralarda Viktor GRADİNARın önderciliindä Kongaz küyün “Altın Çöşmä” halk oyunnarı uşak ansamblinin artistleri temsil ettilär, kendi kıvrak oyunnarınnan hem kostümnarınnan siiredicileri büüledilär.
Eridir urgulamaa, ani İstanbuldakı XXVI-cı Türk halkların Halklararası “Türk dünyası Çocuk şöleni” festivalin türk dünnäsı uşak vokalı yarışmasında Gagauziyadan genç türkücüyka Gülnara BATIRALİYEVA, “Gagauz Erim” türküyü (laflar hem muzıka – Valentin Ormancı) çalıp, II-ci er ödülünü kazandı.
Bir şüpesiz var nicä sölemää, ani Türkiyenin “Çiçek ayın 23-çü milli baamsızlık hem Uşaklar yortusu” (“23 Nisan Ulusal Egemenlik ve Çocuk Bayramı”) günündä Samsunda hem İstanbulda olan bu iki sırada, hepsi katılan kolektivlar kendilerinin türkü, muzıka hem oyun yaratmalarınnan gösterdilär bütün türk dünnäsı kultura alanının zenginniini hem çeşitliliini hem onu, anı bu kultura sade birliklän hem dostluklan gelecää varacek.
