Harman ayın 3-dä Gagauziya İspokomun hem Halk Topluşu binasının önündä yapıldı Gagauziya Başkankası Evgeniya GUȚULa serbest brakılması hem ona arka olmak için miting, neredä pay aldı bir bin kişiya yakın insan.
Nicä açıkladılar mitingı hazırlayannar, herliim yollarda polițiya mitinga gelän insannarı durgutmaydı, onda katılannarın sayısı birkaç bin insan olaceydi.
Miting Moldovanın hem Gagauziyanın Gimnalarının çalınmasınnan başladı. Sora da, mitingta nasaat edennär dä, katılan insannar da istärdilär ev arestında bulunan Gagauziya Başkankası Evgeniya GUȚULun serbest brakılmasını.
Mitingta pay alannar Gagauziyanın hem Moldovanın ellerindä bayraklarını hem gagauz, rus, moldovan hem angliyca dillerindä Evgeniya GUȚULun serbest brakılması için transporantları tutardılar.
Mitingın sonunda bir rezolüțiya kabledildi hem angliyca büük bir baner “Free Gutul! Free Gagauzia!” yayıldı. Nicä bildirdilär mitingı hazırlayannar, bu banerın yayılmasının sebepi oldu o, ani Moldovada bulunan “saar hem kör olan” Evropa hem dünnä diplomatları, beki, göreceklär hem işidileceklär Gagauziya halkın istediini. Onnar işitmärsä – baarliim düneyin sıradakı insannarı işitsin hem görsün.
Miting zamanı, binanın önündä bulunan insannara, bir video danışması yaptı kaçak oligarh İlan ŞOR.
Not. 2025-ci yılın Baba Marta ayın 25-dä Kişinev aeroportunda Moldovanın antikorupțiya Merkezi (CNA) tarafından tutuklanan Gagauziya Başkankasına Evgeniya GUȚULa 05.08.2025 günü Kişinev Boyukan sudunda ceza kararı alınacek.
