Kırım ayın (dekabri) 23-dä Komradın kultura Evindä “Gagauziya (Gagauz Yeri) özel hak statusu için” Zakonun kabledilmesinin 19-cu yıldönümünü kutladılar.
Kutlamalarda pay aldılar Gagauz Respublikasının kurucular, Gagauziyanın büünkü öndercileri, diplomatlar, Türkiyedän hem Ukraynadan musaafirlär.
Zalda bulunan insannara hem bütün Gagauziyaya (GRT kutlamadan cannı yayın verdi) kutlama sözlerinnän danıştılar Gagauziya başkanı Mihail FORMUZAL, Gagauziya Halk Topluşu Başın yardımcısı Aleksandr TARNAVSKİY, Moldovada Evropa Birlii misiyasının Büükelçisi Pirkka TAPİOLA, Moldovada Türkiye Büüeklçiliin musteşarı Orhan IŞIK, Ukraynanın Bolgrad rayonun predsedateli Mariya GAYDARCI hem başkaları.
Başkan Mihail FORMUZAL, kutlama sözündän kaarä, Gagauziyanın eni ödülünü “Gagauziya Ordenını” dört kişiyä baaşladı: Stepan TOPALa, Mihail KENDİGELÄNa, Leonid DOBROVa hem Kipra Universitetın rektoruna Suat GÜNSELä.
Kendi sözündä Mihail FORMUZAL kötüledi Modlovanın evropaya girmesini, ama Canabisinin dostu Pirkka TAPİOLA bu kötülemeyi sildi da annattı Gagauziya insannarına ne gözäl yaşamak olacek burada, açan Moldova Evropaya girecek.
Kendi konuşmasında Moldovada Türkiye Büüeklçiliin musteşarı Orhan IŞIK kutladı Gagauziya halklarını bu yortuylan hem okudu Türkiye Respublikasının Başbakan Yardımcısı Sn. Bekir BOZDAĞın kutlama mesajını.
“Gagauziya (Gagauz Yeri) özel hak statusu için” Zakonun kabledilmesinin 19-cu yıldönümünü kutlamaları başarıldı bir büük konţerlan.
