Hederlez ayın (may) 6-da, Gagauziya kultura Upravleniyasının çalışmasınnan hem İspolkomun bütün kuruluşların yarımınnan, Çadırdakı “At-prolin” tamazlık at fermasının ipodromunda Gagauziya kutladı Hederlez yortusunu, angısı “Canavar yortuları”mızlan hem “Kasım” yortumuzunnan bilä, sayılêr dedelerimizdän kalma en büük hem maanalı milli yortulardan birisi.
Bakmadaan ona, ani Hederlez ayın (may) 5-6 gecesindä yaadı bir büük yaamur, Çadırdakı “At-prolin” tamazlık at fermasının auluna toplandılar bütün Gagauziyadan insannar hem artistlär. Kendi aullarını kurdular avtonomiyanın 12 küüyü, ani, kendi sergilerindän kaarä, “Kurban bulguru” konkursuna da katıldılar.
Bundan kaarä, yortuya katılannara deyni, türlü oyun hem sport bölgeleri kuruldu, el ustaların panayırı açıldı hem kilimnär sergisi yapıldı.
Yaamur beterinä, artık adet olan, “Altın At” at koşuları yapılmadı, ama onnarın erinä Bender kasabasından gelän “Sparta” atlı sport klubun sportsemennarı “konkur” yarışı elementlarını gösterdilär. Ayırıca atlı eşektä yarışmalar yapıldı.
Yortu başarıldı büük bir konțertlän hem 500 kişilik fleşmoblan.
Hederlez yortusunun kutlamasında, Gagauziya öndercilerindän kaarä, pay aldılar diplomatlar, Türkiyedän hem başka erlerdän musaafirlär, bilim, kultura hem sıradan insannar.
Patretlär: GKUnun
