Kasım ayın 20-dä romın dilindä üüredicilik verän Komrat “Mihai Eminesku” Teoretik Lițeyi Cümne Kuruluşun eni yapılan korpusunun Moldova hem Romıniya tarafından açılışı yapıldı, angısının düzülmesinä 2020-ci yılda kayıllık verdiidi Gagauziyanın İspolkomu hem angısı yapıldı Romıniya devletin pravitelstvosu tarafından verilän 15 milion leylän.
Komrat “Mihai Eminesku” Teoretik Lițeyi Cümne Kuruluşu eni korpusunun açılış sırası için Komrada maasuz geldilär Moldovanın dışişleri hem Evropaya integrațiya ministerliin ministrusu Mihay PAPUŞOY hem Rominiya dışişleri ministrusu Luminița ODOBESKU.
Canabilerini burada selämnadılar üürencilär hem üüredicilär, “Mihai Eminesku” lițeyin direktoru Svetlana STOYNOVA, Komrat primarı Sergey ANASTASOV hem Moldova üüredicilik ministerliin devlet sekretari Valentina OLARU.
Eridir urgulamaa, ani bu korpusun ilk temel taşı koyuldu 2020-ci yılda, ozamankı Gagauziya Başkankası İrina VLAHın zaametlerinnän. Ama şindi, açan sıra geldi hazır korpusun açılış şiridini kesmää, neçin sä, bu sıraya buyur edilmedilär ne Gagauziyanın öndercileri, ne dä Gagauziya üüredicilik Upravleniyanın temsilcileri.
