Kasım ayın 8-dä, Ay Dimitri günündä, Gagauziyada “Gagauz şarabın yortusu” oldu. Yortuya katıldılar şarapçılar hem musaafirlär diil salt Gagauziyadan, ama Moldovadan, Türkiyedän, Rusiyadan hem taa 10 devlettän ofiţial delegaţiyalar, ani ilersi günnerdä I-ci Halklararası investiţiya forumunda pay aldılar. Yortunun baş sponsoru TİKA oldu.
Gagauz şarabın yortusu için Komradın merkez meydanında erleştilär Gagauziya küülerin hem kasabaların aulları, şarap fabrikaların stendları, halk ustaların hem resimcilerin sergileri.
Yortunun açılış sözünü yaptılar: Gagauziya Başkanın birinci yardımcısı, Yortunun Tertip komitetın başı Vadim ÇEBAN, Gagauziya Başkanı İrina VLAH, Gagauziya Halk Topluşun Başı Dimitriy KONSTANTİNOV, Moldova çiftçilik hem iyecek industriyası Ministreliin ministr yardımcısı Êduard GRAMA, Moldova soţialistlar partiyasının temsilcisi Zinaida GREÇANAYA, Moldova Parlamentın deputatı Demyan KARASENİ, Türkiye Kişinev Büükelçisi Mehmet Selim KARTAL, Rusiya Kişinev Büükelçisi Farit MUHAMETŞİN, TİKA programaların Kişinev kordinatorluk Ofisin kordinatoru Canan ALPASLAN, Moldova turizma agenstvosunun başı Yuriy KARP.
Açılıştan sora, Gagauziya Başkanı hem ofiţial delgaţiyaların musaafirleri aulları gezdilär hem şaraplan birliktä milli imekleri dattılar.
Yortuda türlü şaraplar hem imeklär vardı. Herbir aul kendi şenniklerini gösterärdi, muzıkantlar çalardılar, oyuncular durmamyca oynardılar, tuz-ekmeklän musaafirleri karşlardılar hem onnara filcan sürärdilär.
Şarabın yortusunda ayırdılar hem islää şarpları hem şarapçıları, “En islää kaurma”yı hem “En islää aul”u, literatura konkursunda enseyenneri.
Başarıldı “Gagauz şarabın yortusu” büük bir horuylan, angısını meydanda oynadılar hepsi kim yortuya katıldı.
***
“Gagauz şarabın yortusu”nun Büük baaşışı – “Büük Fıçı” – verildi “Kazayak-Vin” fabrikansına, Gagauziyanın imicının kurulmasında hem ilerletmesindä çalışmaları için, fabrikanın genişletmesindä en büük invistiţiyalar için hem ekonomikada en üüsek başarılar için. Kalan enseyennerä, baaşış olarak, “Küçük fıçı” verildi.
Şaraplar hem şarapçılar arasında konkursunda degustaţiya komisiyasına 21 nominaţiyada 117 türlü şarap teklif edildi. Kokursun sonuçlarını açıkladı degustaţiya komisiyanın başı Lüdmila FİLEVA.
21 nominaţiyadan 14-dä ensedi “Komrat şarapları” fabrikanın şarapları: “2015 yılın bereketindän en islää kırmızı şarap” – kaberne; “2015 yılın bereketindän en islää biyaz şarap” – fetäska; “2015 yılın bereketindän en islää biyaz desert şarabı” – muskat; “2015 yılın bereketindän en islää kırmızı desert şarabı” – kagor; “En islää markalı biyaz şarap” – 2013 yıldan şardone; “En islää kırmızı şarap” – 2014 yıldan merlo; “En islää kaberne” – 2013 yıldan; “En islää markalı kırmızı şarap” – 2012 yıldan merlo; “En islää markalı kaberne” – 2011 yıldan; “En islää biyaz desert şarabı” – 2014 yıldan muskat; “En islää markalı biyaz desert şarabı” – 2013 yıldan muskat; “En islää kolekţiyalı biyaz desert şarabı” – 1994 yıldan Auriu; “En islää kolekţiyalı kırmızı desert şarabı” – 2010 yıldan kagor; “En islää kagor” – 2014 yıldan.
21 nominaţiyadan 4-dä ensedi “Vinariya Bostovan” fabrikanın şarapları: 2015-ci yıldan kagor; kırmızı şarap – 2015-ci yıldan pino-nuar; kırmızı desert şarabı – 2014-cü yıldan saperavi; biyaz şarap – 2015-ci yıldan sovinyon.
DİPLOMALARI KAZANDILAR:
“DK-Intertreyd” fabrikanın şarapları: “Blagosvet pashalnıy” kagoru 2013-cü yıldan (en islää kolekţiyalı kırmızı desert şarabı), 2014-cü yılın markalı kagoru hem en üüsek kaliteli 2014-cü yılın kagoru (en islää kırmızı desert şarabı).
“Kazayak-Vin” fabrikanın şarapları: 2014-cü yılın kabernesi, 2014-cü yılın markalı kabernesi, 2005-ci yılın “Kazayak” şarabı.
“Tartkomvin” fabrikanın şarabı: 2015-ci yıldan biyaz şarabı.
“Çok-Maydan-Vin” fabrikanın şarabı: 2015-ci yıldan kırmızı şarabı izabela.
“C.G.L.-Prim” fabrikanın şarabı: 2014-cü yılın kagoru.
EV ŞARAPÇILARIN ARASINDA:
“En islää biyaz ev şarabı” – Pötr TODUR (şarap – kostel); “En islää biyaz desert ev şarabı” – İordan SARANDİ (şarap – muskat ottonel); “En islää kırmızı ev şarabı” – Segey SARI (şarap – kaberne); “En islää desert hem kırmızı desert ev şarabı” – Dimitriy SARI (şarap – kagor); “En islää pembä ev şarabı” – İordan SARANDİ (şarap – gamburg muskatı).
ÇİFTÇİLİK FERMA ÇORBACILIKLARIN ARASINDA:
“Gör Kuş” (Komrat), “Sarandi İordan” (Tülü küüyü), “Eniycä” (Kongaz), “Kongazçık” hem “Lidiya” (Komrat).
***
Gagauz şarabın yortusunda oldu taa iki konkurs: “En islää kaurma” hem “En islää aul”.
Jürinin kararına görä “En islää kaurma” vardı Aydar, Beşalma hem Valkaneş aullarında.
***
“Gagauz şarabın yortusu” II-ci literatura konkursun sonuçları açıklandı. Jürinin kararına görä erlär ölä payedildi:
1-ci eri payettilär – Todur MARİNOGLU (Avdarma) hem Pötr MOYSE (Komrat);
2-ci er – Viktor KOPUŞÇU (Kıpçak);
3-cü er – Aleksandr KARASENİ (Kongaz).
Hepsi bu poetlara Diploma hem para baaşışı verildi.
Not. “Gagauz şarabın yortusu” 1-ci literatura konkursunda 2014 yılda ensediydi Todur ZANET.
***
Yortuda Rusiyadan güreş trenerına Dimitriy GERÇİOGLUya sportta hem genç sport boylarını terbietmektä büük başarılar için “Gagauziyanın Şannı vatandaşı” adı verildi.
