Bütün dünneyin hristiannarı Büük ayın (yanvar) altısından edisinä karşlı Kolada yortusunu bakêrlar –İsus Hristozun duuma gününü. Bu yortuyu Gagauziyada da pek geniş, sıralı hem saygılı bakêrlar.
Koladacılar, evlerdä gezip, insannarı yortuylan kutlêêrlar. Dua ederlär bereketli hem kısmetli yıl olsun, saalıklı hem mutlu insannar olsun.
Kolada gezmää deyni küülerdä birkaç “kol” kurulêr. O “kol”a toplanan delikannılar ayırêrlar kendilerinä bir “Ţar”, da Koladaya orucunda, onun evindä toplanıp, “Kolada” türkülerini üürenerlär hem “Kolada” gezmää hazırlanêrlar. Sora da, vakıt geldiynän, Büük ayın (yanvar) 6-da küü içinä kızaklan yada taligaylan “Kolada” gezmää çıkêrlar.
Bu yıl Kolada yortusu haliz Kolada yortusu oldu: kaarlı, lüzgärli, saurgunnu, ayazlı! Bu iş pek sevindirdi “koladacıları” hem cümne insanı. Zerä verdi taa büük şennik ham mutluluk!
Gagauziyanın en büük küyündä, Kongazda, birkaç “kol” Kolada gezdilär. Onnarın birisinnän sizi tanıştırêrız (patrettä): ţar – Födor MARİNOSKİY, popaz – Vasiliy KARASENİ , koladacılar – Grigoriy STATOV, Nikolay KARASENİ, Konstantin BASARAB, Sergey DUŞKOV, İvan MARİNOVSKİY. Belliki, adetä görä bu “kol”da vardı kedi da (Grigoriy KÜRKÇÜ) hem ezdovoy da (Todur TATAR).
PATRETLERDÄ: Kongaz küüyündän bu “kol” İosif hem Marina KARASENİlär aylesini Koladaylan kutlêêrlar.
