Kırım ayın (dekabri) 20-dä Kişinevda, Moldovanın etniklärarası Bürosunda, “Gagauziya (Gagauz Yeri) özel hak statusu için” Zakonun kabledilmesinin günündän 19 yılını kutladılar.
Kutlama programasında vardı “tombarlak masa” konuşmaları, resim sergisinin açılışı hem konţert.
Tombarlak masayı açtı Moldovanın Gagauzlar obşçinasının başı Nilolay TERZİ. Sora nasaat ettilär Gagauziyanın İspolkomun predsedatelin yardımcısı Valeriy YANİOGLU, Moldovanın etniklärarası Bürosunun başı Elena BELÄKOVA, Moldovanın birinci parlamentın deputatları Födor ANGELİ, İvan ZABUNOV hem sayın SİDOROV, “Ana Sözü” gazetanın baş redaktoru hem yazıcı Todur ZANET, Moldova parlamentın deputatı Oleg GARİZAN, Stepan BULGAR “Kardaşlık” kuruluşun başı Konstantin SIRF.
Konstantin SIRF hem Valeriya YANİOGLU kutladılar anılmış gagauz işadamını Georgiy İvanoviç KISSAyı üüsek devlet nagradasının “Om Emerit” kabletmesinnän.
Resim serginin açılışından sora hem onunnan tanışmaktan sora, kutlamalara katılannara etniklärarası Bürosunun büük salonunda konţert gösterildi. Konţerttä pay aldılar Gagauziyanın duhovoy orkestrası, “Düz Ava” ansamblisi, “Elegiya” kemençecilär ansamblisi, “Yujnıy Drayf” ansamblisi, solistlär Mariya KISA, Vitaliy VASİLİOGLO.
Not. Kutlamayı, badaşıp, hazırladılar Gagauziyanın İspolkomu, Moldovanın etniklärarası Bürosu, Moldovanın Gagauzlar obşçinası.
