Kırım ayın 23-dä Kongaz küüyün Kultura Evindä bakıldı Gagauziya avtonomiyasının 20-ci yıldönümü. Kutlamalarda pay aldılar Gagauziyadan, Moldovadan, Türkiyedän, Ukraynadan, Estoniyadan musaafirlär.
Yortuya katıldılar cümne hem politika insannarı, diplomatlar, primarlar, kultura insannarı, üüredicilär hem şkolaların direktorları. Zalda vardılar onnar da, kim 20 yıl geeri Gagauziyanın kurulmasına köstek koyardılar hem bizi gülmää alardılar, ama şindi “geroy” oldular.
Tribunadan nasat ettilär ozamankı Moldova prezidentı Mircea SNEGUR (Canabisi “Gagauziya (Gagauz Yeri) özel hak statusu için” Zakonu imzaladıydı), Stepan TOPAL hem Mihail KENDİGELÄN, başka Gagauziyanın veterannarı, büünkü Gagauziya öndercileri, yabancı devletlerdän delegaţiyaların başları, diplomat misiyaların öndercileri.
Maasuz Gagauziya avtonomiyasının 20-ci yıldönümü için Gagauziyanın insannarına hem paalı musaafirlerä nagradalar (ordennar hem medalilär) kucak dolusu daadıldı.
Hep o günü Kongaz küüyü hem Ukraynanın Vinogradavka (Kurtçu) küüyü kardaş küülär anaşmasını imzaladılar. Hem da Komrat rayonu hem Estoniyanın Azeri rayonu da kardaş rayonnarı annaşmasını imzaladılar.
Bir gün ileri, Başkannık binasında açıldı bir tablo, neredä yazılı Moldova Parlamentının hepsi deputatları, ani 1994-cü yılda “Gagauziya (Gagauz Yeri) özel hak statusu için” Zakonu kablettilär hem Gagauziya Halk Topluşun deputatları.
Yortulu toplantıdan sora Kultura Evindä bulunan insannara deyni konţert gösterildi.
Foto – Gagauziyanın ofiţial saytından.
