Kırım ayın 16-da Komrat kasabasının “Hoca Nastradin” uşak başçasında oldu pek gözäl bir sıra, ani baaşlanmıştı Gagauziyanın 28-ci yıldönümünä hem gagauz yazıcısı hem Akademii, “Ana Sözü” gazetasının baş redaktorunan Todur ZANETlan buluşmaya: https://www.facebook.com/profile.php?id=100066518916259.
Demää, ani bu sıra gözäldi – bu bişey dememää. Bu sıra gözelin gözelisiydi, çünkü uşak başçasının gagauz dilindä üüredici terbiediciykası Natalya İlyiniçna KROYTORun tarafından terbiedilän hem hazırlanan uşaklar ölä gözäl bir kutlama sırası hazırlamıştılar, ani onnara mayıllıktan sıraya gelän baş musaafirin hem zalda bulşunan anaların bobaların, uzak başçasının zaametçilerinin hem cannarı eriyärdi.
Başlayıp, ellerindä Gagazuiya Bayracıkları olaran, gagauz milli renklerindä rubalara giimni uşakların zala gözäl sıralı girişlerindän hem taa hep ölä gözäl çıkışlarından, uşaklar gagauzların mayıllı “Üç ayak” hem “Kadınca” oynnarını oynadılar, Todur ZANETin peetlerini okudular, Hoca Nastradinnän baalı fıkraların hem halk masallarınnan ilgili tearulu sțenkaları gösterdilär. Bir şüpesiz, yortulu sıranın en tatlı şerbeti oldu o, açan uşaklar “Oglan” türküsünü çaldılar.
Sıranın sonunda yortuyu hazırlayannara hem zalda bulunannara danıştı sıranın baş musaafiri yazıcı hem Akademik Todur ZANET, angısı kutladı hem meteetti uşakları hem “Hoca Nastradin” uşak başçasının zaametçilerini bölä gözelin gözelisi olan sıraylan, okudu kendi peetini hem baaşladı uşak başçasına eni çıkan “Aya Mariya” kiyadını, peet toplumunu hem “Ana Sözü” gazetasını. Uşaklar da baaşladılar Canabisinä kendi kıvrak elceezlerinnän yapılan Gagauziya Bayraanı.
“Hoca Nastradin” uşak başçasının direktoru Veronika Födorovna KAZAK da kendi sözündä şükür etti gagauz yazıcızına hem analara-bobalara, ani saymadılar zaametlerini dä geldilär o günü uşak başçasına hem büük havezlän siirettilär sırayı hem pay oldular uşaklardan.
