Orak ayın (iyül) 19-da Komrat kasabasının baş meydanında oldu Gagauziya Halk Topluşun maasuz toplantısı, neredä Gagauziyanın eni seçilän Başkankası Evgeniya GUȚUL Gagauziyaya hem Gagauz halkına emin etti.
Toplantıyı açtı Gagauziya Halk Topluşun Başı Dimitriy KONSTANTİNOV. Nedän sora Gagauziya Merkez Seçim Komisiyasının başı Yana KOVALENKO seçimnär için annattı hem söledi, ani Komrat Apeläțiya Palatası Hederlez ayın (may) 22-dä temelleştirdi Gagauziya Merkez Seçim Komisiyasının kararını, ani Evgeniya GUȚUL Gagauziyanın eni Başkankası seçildi.
Bundan sora, Gagauziyanın eni Başkankası Evgeniya GUȚUL, “Gagauziyanın (Gagauz Yeri) Temel Zakonu” kiyadın üstünä saa elini koyup, emin etti.
Bundan sora, Gagauziya Merkez Seçim Komisiyasının başı Yana KOVALENKO verdi, artık halizdän kuvedä girän Gagauziya Başkankasına Evgeniya GUȚUL başkanın kimnik belgesini.
Gagauziya Başkankasını Evgeniya GUȚULu tribunadan kutladılar Komrat hem Kaul episkopu ANATOLİY hem Türkiyenin anılmış artistı Burak ÖZÇİVİT.
Gagauziyanın Başkanka Evgeniya GUȚUL presaya kısa açıklamasında, şükür etti hepsinä, kim ondan yanı oldu hem, tekrar bildirdi, ani Moldovanın hepsi öndercilerinä inaugurațiyası sırasına teklif yollandı, ama onnarın hiç birisi da bu tekliflerä cuvap ta vermemişlär. Başkanka Evgeniya GUȚUL bildirdi, ani sade presadan üürenmiş, ani ne Prezident Maya SANDU, ne premyer-ministru Dorin RECEAN, ne dä parlament spikerı İgor GROSU bu sıraya gelmeyeceymislär hem gelmedilär dä.
