Orak ayın (iyül) 19-da Komradın baş meydanında olaçek Gagauziyanın eni seçilän Başkankasının inaugurațiyası sırası, nerdä Başkanka Evgeniya GUȚUL Gagauziyanın hem Gagauziya halkların önündä emin verecek.
Moldovanın Prezidentı Maya SANDU, premyer-ministru Dorin REÇAN hem Moldova Parlamentın PAS (“Çalışmak hem Birlik”) partiyasının deputatları bildirdilär, ani inaugurațiya sırasına gelmeyeceklär. Gelmeyeceklär – gelmeyeceklär.
Ama taman bu inaugurațiya sırasına karşı, Moldova Parlamentın ekonomika, bucet hem finans uurunda komisiya başı Marian RADU Orak ayın (iyül) 18-dä açıkladı, ani Gagauziyanın bucetını 500 milion ley keseciklär, ne üzerä “bu problemanın” çözülmesi için Moldovanın Vergi kodeksına diiştirmeklär yapaceklar.
Gagauziyanın eni seçilän Başkankası Evgeniya GUȚUL bu Merkez kuvetlerin kararına karşı bir yazı yazdı, angısının özü budur: “Pek canımız acıyer, ani onnar, kim kuvedä geldi, kendilerinin enilmesini tanımêêrlar! Pek raatsız eder o, ani onnar kendi amellikleri için vatandaşlarımızın yaşamak durumunu kurban getirmää hazır. Onnarın bu yaptıkları gösterer, ani kuvet kendi istediindän Avtonomiyadan atılêr”.
