Koronavirus hastalıından korunmak için Gagauziyanın Üstolan durumnarın Upravleniyası (ÜDU) danıştı insannara korumak teklifinnän.
Koronaviruslar nedir?
Koronaviruslar – hayvannara dokunan bir virus aylesi, ama o var nicä insannara da ulaşsın. O üzerä, insannarın saalıını hem ömürünü korumak için, Gagauziyanın Gagauziya Avtonom-teritorial Bölgesinin ÜDU-su teklif eder şu kurallara uymaa:
1-ci kural. Ellerinizi sıkça sabunnan yıkayın.
Kullanıp yıkayıcı himiya mallarını, paklayın hem dezinfekțiya yapın kullanılan erlerä.
Ellerin gigienası – bu grip hem koronavirus infekțiyasının profilaktilasına önemni önnemädir. Sabunnan yıkanmak virusları yok eder. Kolaylık yoksa ellerinizi sabunnan yıkamaa, ozaman kullanın spirtli yada dezinfekțiya yapan salfetkaları.
2-ci kural. Arayı hem etiketı gözledin.
Hastadan saa insana viruslar geçer soluk-damna yolunnan (ansırarkana, üüsürürkenä), bu üzerä hasta insandan lääzım en aazdan 1 metra uzaklıkta durmaa. Sakının ellerinizlän dokunmaa gözlerinizä, burnunuza yada aazınıza. Grip hem koronavirus bu yollarlan yayılêr.
Hastalanmak riskını aazaltmak için kullanın maska yada elinizdä olan başka korunmak tertiplerini (ektä rus dilindä açıklamalar). Üüsürürkän, ansırarkan lääzım burnunuzu hem aazınızı tek kerä kullanan salfetkaylan kapayasınız da onu sora sıbıdasınız.
Yolculuktan hem kalabalık erlerdän korunarak, var nicä hastalanmak riskını aazaltmaa.
3-cü kural. Saalıklı bir yaşamaya uyun.
Raat hem uygun uykulu, proteinnän, vitaminnän hem minirallarlan zengin iyecekli hem aktiv yaşamaya uygun olan saalıklı bir rejimä uyun.
4-cü kural. Solumak organnarınızı medițina maskasınnan koruyun.
Solumak organnarınızı korumak için medițina masklarını kullanêrlar:
– kalabalık erlerdä, trennerdä hem cümne transportunda yolculukta;
– keskin respirator viruslu infekțiyalarınnan hastalıklarının zeedelenmä durumunda;
– keskin respirator viruslu infekțiyalarınnan ulaşan hastaların bakımında;
– keskin respirator viruslu infekțiya simptomnarınnan olan insannarlan lafedärkana;
– soluk-damna yolunnan geçän başka infekțiyalara ulaşmak riskı varsa.
Maskayı nicä lääzım dooru taşımaa?
– maska lääzım sıkı baalansın, boşluk brakmadaan aazı hem burnuyu sıkıca kaplasın;
– maskayı çıkararkana savaşın onun dış tarafına dokunmamaa, herliim ansızdan dokunarsanız, ozaman yıkayın ellerinizi sabunnan hem spirtli mallarlan;
– yaş yada nemni maskayı lääzım eni hem kuru maskaya diiştiräsiniz;
– tek kulanışlı maskayı ikincilää kullanmayın;
– kullanılan tek kulanışlı maskayı hemen boklaa atın.
5-ci kural. Grip yada koronavirus infekțiyasına ulaştıynan ne lääzım yapmaa?
Evinizdä kalın hem çabuk danışın doktora. Doktorun izininä uyun, döşek rejimini kullanın hem nekadar çok sulu işleri için.
Grip yada koronavirus infekțiyasının simptomnarı nedir?
Yangın, titremäk, baş aarısı, halsızlık, burnu tıkanıklıı, üüsürük, zor solumak, kas aarıları, konyuktivit. Kimi durumnarda ürek-barsak bozulması olabilir: ürek bulanması, kusmak, ürek sürmesi.
Aylenizdä biri grip yada koronavirus infekțiyasına ulaştıynan ne yapmaa?
Çaarın doktoru. Hastaya bir oda ayırın. Bunu yapamazsanız, hastadan hep 1 metra uzakta durun. Hastanın hem yakınnarınızın, maasuzdan uşakların, yaşlıların hem hronikli hastalıkları olannarın arasındakı kontaktları azaltın.
İçerlerini sık havalandırın. Temizlii koruyun, yıkayıcı himiya mallarınnan nekadar sık paklayın hem dezinfekțiya yapın kullanılan erlerä. Ellerinizi sıkça sabunnan yıkayın. Hastayı bakarkana, aazınızı hem burnunuzu maskaylan hem başka korumak tertiplerinnän (basma, garuz h.b.) kapayın. Hastayaı lääzım baksın aylenizin sadä bir kişisi.
Üstolan durumda 112 nomerä danışın.
