Baba Marta ayın 10-da Moldova Parlamentın “Cümneylän baalantılar hem işbirlii Departamentı” açıkladı, ani Moldova Parlamentın Başı İgor GROSU imzalamış izini, angısına görä “Gagauziyaylan çalışmak parlamentar iş grupası” kurulmuş.
Açıklamaya görä belli oldu, ani bu grupada 11 kişi var. Dooru, onnarın 6-sı “Çalışmak hem Birlik” (PAS) partiyasının adamnarı, kalan 5 eri dä Parlamentın, ölä denilän, opozițiya frakțiyalarından birär kişi doldurdu. Grupanın ortak predesedateli “Çalışmak hem Birlik” (PAS) partiyasından deputat Larisa VOLOH koyuldu.
Bildiriler, ani bu grupa Moldova Parlamentı hem Gagauıziya Halk Topluşu arasında bir dialog meydanın kurulması kalubu sayılêr hem onun baş uuru: Gagauziyaylan ilgili zakonnarın Moldova Konstituțiyasına uygun olmasını incelemää.
Bu türlü kalup 2015-ci yıldan beeri kurulu, ama ondan Gagauziyaya hiç bir fayda olmadı hem, şindiyä kadar, ortaya salt kara yımırtalar yımırtlandı.
Söz gelişi, “Gagauziya (Gagauz Yeri) özel hak statusu için” Zakonunu diiştirmäk hem onun Konstituțiya statusunu düşürmäk için “Çalışmak hem Birlik” (PAS) partiyasında Moldova Parlamentında 67 oy olmadıı için, onnar Moldova yustițiya ministerliin yolunnan, Moldova Konstituțiya Suduna Gagauziyaylan ilgili danışmak yaptılar BURADA BAK.
Hiç bir şüpeniz dä olmasın, ani Konstituțiya Sudu onnara yan olmayacek da konstituțiyala zakonu diil 61 oylan, ama 51 oylan kablettirecek.
Hepsi biler, ani “Bir işi yok etmää istärsän – komisiya kur!” Bizim durumda da bölä, çünkü dill bir kerä gördük, nicä artık on yıldan zeedä bu türlü grupaları kurup, merkez kuvetleri Gagauziyayı otladêr.
Patret: parlament.md saytından
