“Altın yazal” – bölä ad koydular “Genç gagauz yazıcılar Birliin” azaları o buluşmalara, nereyi teklif ettilär anılmış gagauz yazıcılarını, poetlarlanı, dramaturglarlanı. Bu yapıldı ustalar gençlerä master-klas veresinnär deyni.
Master-klas buluşmaları başladı Orak ayın (iyül) 16-da Komrat “ATATÜRK” biblioteksında. O günü bibliotekaya geldilär genç yazıcılar Alla BÜÜK (“Genç gagauz yazıcılar Birlii” başı), Kristina KOÇAN, Alla KÖSÄ, Yuliya KURDOGLU, Mihail KÜRKÇÜ, Elena MOKANU, Anna PANAİTOVA, Mariya STEFANDRİYA hem Nina TASMALI. Onnara deyni literatura ustalıında master-klas gösterdi poet, yazıcı hem dramaturg Todur ZANET.
Canabisi annattı gençlerä ne o literatura, nedän lääzım başlamaa, nicä peet düzüler, angı kaluplara görä o yazılêr. Usta açtı poeziya inceliklerin kapularını hem okudu peet örneklerini anılmış gagauz yazıcısının hem poetın, publiţistın hem dramaturgun, gagauz literatura klasiyn Nikolay BABOGLUnun yaratmaklarından, gösterip ne o halizdän ustalık hem kimin halizdän Altın Yazalı vardı.
Canabisi savaştı, ani genç yazıcılar işitsinnär hem annasınnar, ani “lääzım yazmaa diil salt ozaman, açan duygular candan taşêr”, ama onu da annasınnar, ani “lääzım yazmaa ozaman, açan duyêrsın, ani var ne sölemää okuycuya, var ne ona eni bişey açıklamaa hem göstermää”.
Master-klas çerçevesindä buluşmalar oldu poet hem yazıcı Petr ÇEBOTARlan hem poet Dimitri POPAZOGLUylan.
PATRETLERDÄ: (saa patrettä, soldan) Anna PANAİTOVA, Kristina KOÇAN, Nina TASMALI, Alla BÜÜK, Yuliya KURDOGLU, Elena MOKANU, Alla KÖSÄ, Mariya STEFANDRİYA hem Mihail KÜRKÇÜ.
Elena MOKANU
Anaktar sözlär : Genç gagauz yazıcılar Birlii, Todur
