Baba Marta ayın 1-dä Gagauziya Halk Topluşu iki okumakta kabletti “Gagauziya Radio Hem Televideniyası “Gagauz sesi” cümne kompaniyası için” zakonu. O zakona görä GRTnın bütün varlıı Halk Topluşuna geçer hem Kompaniya enidän kurulêr.
Bu Zakonnan hem Gagauziya Radio hem Televideniye cümne kompaniyasının Gözledici Sovetin “GRTnın teknik durması için” kararınnan GRTnın televideniye zaametçilerini, bir amansız, sokaa atêrlar. Bu işlän ilgili peydalanêr iki soruş:
1. Neçin sadä televideniye zaametçilerini da diil GRTnın radio zaametçilerini da?
2. Diil mi sadä televideniye zaametçilerini attılar o üzerä, ani bu insannardan kurtulmaa isteerlär?
GRTnın televideniye zaametçileri oldu birkaç gün düülerlär dooruluk için, Allaha danışêrlar, padişahların (oku başkanın hem GHT başının) kapularına urêrlar. Allaa yukarda – işitmeer, padişahlar da, maamilä surat, sansın işiderlär, ne sa adêrlar, ama bişey diişmeer.
GRTnın predsedateli Anna HARLAMENKO işindän çıkması için zayavlenie koydu, teklif edip radioylan televideniye direkrorları hem Gözledici Sovetin azaları da işlerindän atılsınnar. Taa ileri bu kişilär dediydilär, ani Anna HARLAMENKO işindän çıkarsa onnar da çıkaceklar. Ama nicä gösterer durum, televideniye direktorundan kaarä, kalanı alatlamêêrlar iştän çıkmaa. Bunu yapmarsalar ozaman onnar yalancı kalaceklar.
Baba Marta ayın 2-dä Gözledici Soveti tanıştırdı GRT kolektivını GRT geçici predsedatelinnän Dimitri KISSAyı, angısını kolektiv kabletmää istämeer.
Nicä da olsa GRTnın televideniye zaametçileri dooruluu aramaktan vazgeçmeerlär, bakmadaan ona, ani onnarı, bir amansız, sokaa atêrlar.
Todur ZANET, akademik, Gagauz Milli Gimnasının avtoru
