Shiarhimandrit Ioan (Peyoglo) duudu Komrat kasabasında 1964-cü yılda Kıran (dekabri) ayın 11-dä işçi-çiftçi aylesindä. Komratta Panaiyanın İver ikonasının karı manastırı kurucusu. Çok zaamet koydu, ki burada dualar kaldırılsın ana dilindä.
2015 yılın Canavar ayın (oktäbari) 26-da, manastırın kurban yortusunda, verdilär boba İoana üüsek ad – shimarhimandrit. Nicä üüsek basamak olacek shima monahlık yolunda, ölä dä arhimandrit – popazlık yolunda.
Ay-Boba pek beener ana dilindä şiir yazmaa. 2014-cü yılda tiparlandı onun “Günnär yıla benzeer” peet toplumu. Peet yazmaa birzaman da brakılmêêr. Onun derin maanalı şiirleri baalı yaşamanın herbir ipçeezinnän. Onnarda var avtorun dünnä bakışı yaşamakta olan türlü olaylara.
Yaratmalarda duyulêr peetçinin sevgisi Allaha, kendi duuma tarafına, Bucaana, halkına, ana dilinä, ana-bobasına. Onun kimi şiirleri tiparlandı “Ana sözü” hem “Hahikatın sesi” gazetalarda, “Sabaa Yıldızı” jurnalında. Ay-Boba İoanın kimi şiirlerinä yazılı muzıka avası, da büünkü gündä gözäl çalınêrlar estrada çalgıcılarınnan.
Ay-Boba Ioan bütün candan izmet eder Dünnä Yaratıcısına hem kendi halkına. Açan var taa bölä patriot halkımızda, angısının ürää ateş gibi yanêr kendi halkı için, kendi ana dili için, kendi ana topraa için – yaşêêr halkımız, yaşêêr dilimiz, yaşêêr ana tarafımız.
Anna SUKMAN, gagauz dilindä hem literaturasında üüredici
Bayraa
Halkım benim,
Canım benim,
Oolun senin
Bayraa tutsun.
Yıraktan görünsün,
Memeleketlär görsün.
Gagauzlar sayılsın,
Halklarlan sırada olsun.
29.04.2015 y. Çarşamba
Halkım
Toplandı dünnedän
Oolların senin.
Halkım benim,
Topraam benim,
Bucaam benim,
Dilim benim,
Bayraam benim.
“Gagauz!” – dedim.
29.04.2015 y. Çarşamba
Gagauz
Akêr o kan dedelerdän,
Damar çeker taa oradan -
O zor vakıtlardan.
Yıldızlara sorduydum bän:
- Gagauz gördün mü sän?
Evelki vakıtlardan
Onnar kaçkındı hererdän.
Gezä-gezä bu dünnedä
Etişmiş bu topraa –
Gözäl Bucaa.
Dikti onu başça,
Emiş, meyva.
Ekti onu baalar,
Büük-büük salkımnar.
Ekin büüder toprakta,
Biyaz ekmek sofrada.
Bu benim halkım,
Burada Vatanım.
29.04.2015 y., Çarşamba
Tamahlık
Tamahlık insanı bozêr,
Can erini kurudêr.
Tamahlık işleer,
Raatlık kaybeler.
Tamahlık acılêr,
İnsannıı kaybeder.
Tamahlık aaladêr,
Dipsiz kuyuya çeker.
12.10.2015 y., Pazertesi
Ayırılmış
Allaa seni ayırmış,
Seni burayı yollamış.
Çok yıl hazırlamış,
Kara rubalara giidirmiş.
Sän olasın güdücü,
Ayoz gibi koruyucu,
Allaha topluyucu,
Sevgini dä verici.
Sürüyü götürmää:
Onu lääzım toplamaa.
Topladıynan, üüretmää,
Sevgilik cana ekmää.
Stavroz sana verilmä
Panayıyanın Evindä.
Sän ilerdä,
Koyuncukların da geerdä.
12.10.2015 y., Pazertesi
***
Cannarlan lafederim,
Allahım, inanêrım.
İnnanan yaşêêrım,
İnan da ekerim.
Te geler o cannar,
Diz çökerlär onnar.
Kahırını annadêr,
Üreeni da açêr.
Kordan ateş yapayım,
İnsana ürek vereyim,
Dooru yola doorudayım,
Günahtan da kurtarayım.
04.05.2016 y., Çarşamba
***
Baktım – göreyim,
Baktım – sarayım,
Baktım – sorayım,
Baktım – öpeyim.
Biter yaşım,
Biter soluum,
Biter kuvedim,
Biter umudum.
Yanêr yıldızım,
Sendä inanım,
Yalvarêrım Allahım,
Brakmasın sevdacıım.
13.05.2015 y., Çarşamba
Şeremet
Şeremetsin sän,
İşin senin kıvrak,
Boyun senin alçak.
Dönersin nicä pırıldak.
Ne alêrsın elinä,
Yapêrsın nicä kendinä.
Saymêêrsın zaametini,
Darsımêêrsın işindä:
Kazma aldın – kazêrsın,
Nacaa aldın – kıyêrsın,
Süpürgä elindä – süpürersin,
Kuşlara herzaman verersin.
Adını saklayacam,
Hiç birinä sölämeyecäm.
Yanacıını öpecäm,
Senin için dua edecäm.
