Canavar ayın 5-dä bakılêr Halklararası Üüredici Gününä. Bu günä karşı, Canavar ayın (oktäbri) 1-dä Baş küüyündä (Kirsova) geçti pek önemni bir yortulu sıra, neredä kutladılar Gagauziyanın üüredicilik uurunda zaametçilerini: üüredicileri hem terbiedicileri, üüredicilik kuruluşların başlarını, Mihail Çakir adına pedagogika kolecın hem Komrat Devlet Universitetın pedagoglarını.
Yortulu sırasında hepsi bu saygılı insannara açık sözlärlän danıştılar Gagauziya üüredicilik Upravleniyanın başı Natalya KRİSTEVA, Gagauziya İspolkomu Predsedatelin hem Gagauziya Başkanın birinci yardımcısı İlya UZUN, Gagauziya Halk Topluşun Başı Valentin GAYDARCI.
O günü, üüredicilerin hem terbiedicilerin zaametlerinä saygı duyarak, onnarın çoyuna Moldova Respublikasının hem Gagauziyanın ödülleri verildi. Bu ödüllerin arasında vardı Moldova Respublikasının üüredicilik hem aaraştırma ministerliin diplomnarı hem Gagauziya üüredicilik Upravleniyasının gramotaları, Gagauziyanın “Mihail Çakir” ordennarı, “Zaamet şanı” medalileri, “Gagauziyanın şannı vatandaşı” hem “Gagauziyanın kıymetli pedagogu” adları, Başkanın hem Halk Topluşun gramotaları.
Büünkü gündä Gagauziyanın üüredicilik sistemasında işleer 2435 pedagog. Bu yortulu sıra da verdi kolayını onnarın üüsek ustalıını tanımaa hem hepsinä bir şükür saygısı göstermää.
Biz da, “Ana Sözü” gazetasının redakțiyası, kutlêêrız hepsi üüredicileri hem üüredicilik uurunda zaamet edenneri bu gözäl yortuylan. Saalık hem uzun ömür Canabinizlerä. İleri dooru da sevinmeliklän izmet edin uşakları hem gençleri aydınnatma yolunda. Bu zaametlerinizdä Göktä Boba sizä kuvet hem sabur versin.
Saalık Allaa versin!
