Komratta yapılan presa toplantısında “Dünürcülük” adlı ilk gagauzça artistik kinonsunu çıkarannar bildirdilär, ani, başlayıp Kasım ayın 3-dän, Gagauziyada bu kinoyu göstereceklär.
Kinonun rejisöru İvan PATRAMAN açıkladı, ani bu kino çıkarıladı büük gagauz yazıcısı hem literatura klasiinin Nikolay BABOGLUnun “Dünürcülük” annatmasına görä, ama “annatmadan bişey kalmadı, zere sţenarist Todur MARİNOGLU onun sţenariyinı kendiycasına enidän yazdı”.
Kino annadêr gagauzların yaşamasını 1920-30-cu yıllarda. Belliki, onun temel özü – sevda.
“Dünürcülük” kinosunda baş rolleri oynadılar D.Tanasoglu adına gagauz milli teatrusunun artistleri Mihail KONSTANTİNOV hem İlya HACI. Kinonun operatorları Nikolay Ermişko hem Vasiliy KELEŞ. Montaj – İvan PATRAMAN hem İvan GARİZAN.
