UWW (United World Wrestling) kanadı altında Poyraz Makedoniyanın baş kasabasında İsküptä geçän karılar arasında serbest güreştä Evropa Çempionatın U-17 dalında dizginciykalı İrina TERZİ gümüş medaliyi kazandı.
Moldova komandasından serbest güreştä Evropa Çempionatında pay alan Gagauziyanın Dizgincä küüyündän 14 yaşındakı İrina TERZİ, 17 yaşına kadar sportsmenkaların 43 kg kategoriyasında, bu çempianatın gümüş medalisinin saabisi oldu.
Gümüş medaliya yolunda İrina TERZİ ensedi Türkiyedän (5:0) hem Rusiyadan (5:0) güreşçiykaları, ama finalda tarattı Rusiyadan bir başka sportsmenkaya Ranila RAHMANOVAya (2:6).
UWW (Dünnä Güreş Birlii) kaynaklarına görä, bu İrina TERZİnin karılar arasında serbest güreştä halklararası arenada ilk medalisi.
Kutlêêrız gagauzka sportsmenkayı İrina TERZİyi hem onun trenerını Nikolay HACIyı bu büük başarıylan.
Kutluca olsun!
Kaynak: MediaSport
