Kırım ayın 6-da Komradın muzeyi, Komrat Devlet İnstitutun bibliotekasınnan ortaklaşıp, Gagauziyanın yazıcısının, poetın, incäzanaat araştırmacısının, raametli İvan DYAÇUKun 80-ci yıldönümünnän ilgili bir sıra yaptı.
Maasuz bu iş için burada büük bir sergi hazırlandı. Sergidä erleştirilidi İvan DYAÇUKun kiyatları hem yaratmaları diil salt literatura, ama mediţina uurunda da. Zerä Canabisi Gagauziyanın mediţina uurunda ilk bilim doktoruydu.
Muzeydä toplanannarı tanıştırdılar İvan DYAÇUKun bitki kiyadınnan (Canabisi yazardı rusça) «Люди и время: рассказы и стихи». Bu kiyatta toplu avtorun yaşaması için annatmaları, Canabisinin Gagauziyanın insannarınnan hem kultura adamnarınnan buluşmaları hem onnarın yaratmaları için yazıları. Bu kiyatta büük er kaplêêrlar peetlär hem poema «Гагаузы», ani Gagauziyanın yaşaması için hem durumu için annadêrlar.
İvan DYAÇUKun 80-ci yıldönümünnän ilgili sırada hem eni kiyat için, hem daonun avtoru için pek gözäl laflar söledilär kultura insannarı Dimitriy SAVASTİN, Pötr MOYSE, Lüdmila MARİN, Födor KİROVİÇ, Andrey YIVARLAK hem başkaları.
