Kıpçak küüyün S. I. Baranovskiy adına teoretik lițeyin üürenciykası Olga KOLİOGLU, kendi rus dili hem literaturası üürediciykasının Lüdmila Petrovna YANAKOGLUnun önderciliindä, katıldı Rusiyanın Mariy Êl Respublikasının Yoşkar-Ola baş kasabasında olan “Barışa izmettä diplomatiya” III-cü Halklararası olimpiadasına da aldı orada II-ci eri.
Kendi yaratmalarınnan “Barışa izmettä diplomatiya” III-cü Halklararası olimpiadasına katıldılar üürencilär Rusiyadan, Moldovadan hem Tacikistandan. Gagauziyanın Kıpçak küüyündän S. I. Baranovskiy adına teoretik lițeyin üürenciykası Olga KOLİOGLU yolladı orayı yaratmasını, neredä açıkladı kendi fikirlerini Moldovada olan Pridnestovye konfliktina hem Moldovaylan Pridnestrovye arasında o konfliktın çözülmesi yoluna.
Jürinn kararına görä Olimpiadada ödüllendi iki 1-ci, iki 2-ci hem bir da 3-cü er. 2-ci erin birincisi da oldu Kıpçak küüyün S. I. Baranovskiy adına teoretik lițeyin üürenciykası Olga KOLİOGLU. Kutluca olsun!
Not. Mariy Devlet Universitetı tarafından yapılan “Barışa izmettä diplomatiya” Halklararası olimpiadaları baaşlı Diplomatiya zaametçilerin Gününa.
