Kırım ayın (dekabri) 7-dä Kişinevda geçti Moldovanın Halklararası karı klubun (IWCM) 18-ci yardım Kolada paneerını. Paneerda pay aldılar Moldovada bulunan 26 büükelçilii hem diplomatiya misiyaları. Panerda Moldovanın butii da kuruldu. Paneerda satılan malların parasın verilecek Onkologiya İnstitutuna leykomiya hem başka onkohastalıkları olan uşaklara deyni.
Paneerın ofiţial açılışını yaptılar Moldovanın Halklararası karı klubunda (IWCM) başı, Türkiye Büükelçisinin eşi Banu Cankan KARTAL hem Moldova Prezidentın karısı Margareta TİMOFTİ. Açılıştan sora Margareta TİMOFTİ hem Banu Cankan KARTAL hepsi butikleri dolaştılar.
Yardım Kolada paneerında vardı nicä pek ucuz paaya çeşitli malları hem türlü baaşışları almaa, milli imeklerdän hem içkilerdän datmaa.
Paneerda may bütün gün konţert gösterildi. Konţerti Büükelçiliklär hazırlamıştılar.
Bu yıl da, nicä da bıldır, Kolada paneerında en büük butii kurmuştu Türkiye Respublikasının Büükelçilii hem Moldovada TİKA koordinatorluu. Türkiye Büükelçilii becerdi 156 bin leyindän zeedä paraya mal satmaa. Buldırkı paraya görä bu iki katından zeedä bir para.
