Otuz beş yıl geeri, 1990-cı yılın Orak ayın (iyül) 22-dä Gagauz Halkın Üstolan Kongresi 411 oylan (Kongrestä okadar delegat vardı) aldı Karar kurmaa Milli universitetı. Sora da, 1991-ci yılın Küçük ayın (fevral) 11-dä, bu universitet Moldova devleti tarafından tanındı da, Komrat Devlet Universitetı (KDU) olarak, büünkü günnerä etişti.
2025-ci yılın Küçük ayın (fevral) 11-dä Komrat Devlet Universitetı kendisinin 34-cü kurulma yılını yortulu toplantıylan, bilim konferențiyasınnan, sergilärlän hem başka büük sıralarlan kutladı.
KDUnun büük salonunda olan yortulu kutlama sırasında pay aldılar universitetın o günkü büük musaafirleri: çeşitli universitetların rektorları, Moldova üüredicilik hem aaraştırma ministerliin devlet sekretari, Türkiye Respublikasının Büükelçiliin hem başka aşırı devletlerin diplomatları, Türkiye Respublikasının Komrat Başkonsulu, TİKA temsilcileri, Gagauziya Halk Topluşu Başın yardımcıları, bilim insannarı, universitetın üüredicilik personalı hem studentları h.t.b.
Kutlama sözünnän salonda bulunannara 3 dildä danıştı Komrat Devlet Universitetın rektoru Prof. Dr. Sergey ZAHARİYA.
Bundan sora kendi danışma hem kutlama sözlerini söledilär Moldova üüredicilik hem aaraştırma ministerliin devlet sekretari Adriana CAZACU, angısı baaşladı ministerliin Gramotalarını kimi KDU üüredicilerinä, Türkiye Respublikasının Komrat Başkonsulu Adnan HAYAL hem Türkiyedän gelän başaka insannar, TİKA Kişinev ofisin koordinatoru Tarık METE, Gagauziya Halk Topluşu Başın yardımcısı Georgiy LEYÇU, Azerbaycan Tehnik Universitetın (AzTU) rektoru Prof. Dr. Vilayat Memmed oolu VELİEV (onlain), kimi Türkiye Universitetların rektorları (onlain), Komrat primarı Sergey ANASTASOV, angısı baaşadı kimi KDU üüredicilerinä Gramotaları.
Kutlama sözünnän salonda bulunannara danıştı “Ana Sözü” gazetanın baş redaktoru Akademik Todur ZANET ta. Kutlama sözün sonunda Canabisi baaşladı KDUya TİKA yardımınnan tiparlanan kendisinin tarafından hazırladıı eni hem taazä çıkan 6 tomnuk “Büük Gagauzça-Rusça Sözlük”ü.
Yortulu toplantının sonunda KDU rektoru Prof. Dr. Sergey ZAHARİYA verdi universitetın Gramotalarını kimi KDU zaametçilerinä.
Sora, bir şennik olarak, KDU studentları kısa bir konțert gösterdilär.
