Artık adetä görä, Küçük ayın (fevral) 7-dä Komradın kultura Evindä 1971-ci yılda kurulan Gagauziyanın Semön POMETKO adına “Düz Ava” türkü hem oyun halk ansamblisi sıradakı yıldönümünä hem kendi kurucusunun hem ilk öndercisinin Semön POMETKOnun anmasına büük bir konţert gösterdi.
“Düz Ava” türkü hem oyun halk ansamblisi yaratmak konțertini siiretmää hem maestro Semön POMETKOyu anmak için Kultura Evinä geldilär Gagauziya Başkankası Evgeniya GUȚUL hem Gagauziya kultura Upravleniyası başı Marina SEMENOVA, ansamblinin taraftarları, muzıka hem kultura zaametçileri, artistlär hem sıradan insannar.
Uzun vakıt sürtän bu şaşılacek konțert baaşladı unudulmaz bir gözellik hem büülü ustalık hepsinä, kim o günü bu konțertı siiretti.
Maestro Semön POMETKOyu anmak sırasında, Gagauziya İspolkomun hem kultura Upravleniyasının teklifinä görä, “Düz Ava” halk ansamblisinin artistinä hem Gagauziyanın kulturada Kıymetli zaametçisinä Georgiy KURTEVa Gagauziya Başkanın hem Halk Topluşun Şan gramotası hem dä “Gagauziya (Gagauz Yeri) – 30!” medalisi verildi.
