2026-cı Küçük ayın 11-dä Gagauziyanın Komrat Kultura evindä büük hem onurlu sıraylan kutlanıldı Komrat Devlet Universitetın (KDU) kurulma yılının 35-ci yıldönümünü, angısı başladı Universitetın Rektorluk binasında şannı musaafirlerin hem onnarın KDUya baaşış vermelerinnän.
Kutlama sırası başladı Moldova Respublikasının, Gagauziyanın, “Gaudeamus” hem Komrat Devlet Universitetın Gimnalarından, angılarını çaldı KDU studentların horu.
Sora selämnama hem kutlama sözünnän, zalda bulunannara, danıştı Komrat Devlet Universitetın rektoru Prof. Dr. Sergey ZAHARİYA.
Bundan sora, selämnama hem kutlama sözü için, sțenaya buyur edildi Moldova Prezidentı Maya SANDU, angısı urguladı, ani bir millet var sade ozaman, açan o kendi ana dilindä lafeder hem o dili ilerleder. Maya SANDU, urgulayarak, ani Komrat Devlet Universitetı avtonomiyamızı ayakta tutan direklerdän birisidir, söledi, ani lääzım aarlık vermää romın dilin üürenmesinä dä.
Hep kutlama sözlerinnän insannara danıştılar Moldova üüredicilik hem aaraştırma ministerliin devlet sekretari Adriana CAZACU, angısı verdi Ministerliin şannı Diplomnarını KDUnun zaametçilerinä hem veterannarına: Dr. Tatyana RAKOVÇENAya; Prof. Dr. Stepan VARBANa, Komrat Devlet Universitetın eski rektoruna; Tatyana MUTKOGLUya, KDUnun kultura hem İncäzanaat kafedrasının lektoruna.
Komrat kasabasının primarı Sergey ANASTASOV, Ukraynanın Odesa bölgesinin Radasının deputatı Yuriy DİMÇOGLU, Komrat Devlet Universitetın “Doctor Hnoris”ı, maestro Konsatntin MOSKOVİÇ, Modova Universitetların Sovetinin predsedatel yardımcısı İgor ŞAROV, Romıniya Galaț “Dunerea de jos” Universitetın rektoru Marian BARBU.
Bundan sora sțenaya tekrar buyur edildi Komrat Devlet Universitetın rektoru Prof. Dr. Sergey ZAHARİYA, angısı verdi “Şükür plaketları” KDUnun partnörlarına: Tomaş KOBZEYa, Moldovada Polşa Respublikasının Büükelçisinä; Maya DOBREVAya, Moldovada Bulgariya Respublikasının Büükelçisinä; Nikolaos KRİKOSa, Moldovada Grețiya Respublikasının Büükelçisinä; Fred DUİJNaya, Moldovada Niderlanda Respublikasının Büükelçisinä; Eda GÜÇä, Türkiye Respublikasının Komrat Başkonsuluna; Todur ZANETä, akademää, Komrat Devlet Universitetın gimnasının avtoruna; “Düz Ava” türkü hem oyun halk ansamblisinä; Adriana CAZACUya, Moldova üüredicilik hem aaraştırma ministerliin devlet sekretarinä.
KDUnun 35-ci yıldönümünü kutlamaya gelän şannı musaafirlär baaşladılar Komrat Devlet Universitetına türlü baaşışlar: kardaşlık diplomnarını, saygı plaketlarını, çeştli paalılıkları. Akademik Todur ZANET ta, KDUnun gimnasının avtoru hem bu universitetın kurulması için çalışan zaametçilerindän birisi olarak, baaşladı burayı kendi literatura, folklor hem istoriya uurunda kiyatlarını.
Komrat Devlet Universitetın (KDU) kurulma yılının 35-ci yıldönümü kutlama sırasında insannar vardı nicä tanışsınnar resim sergisinnän hem o sıra başarıldı bir konțertlan.
Not. 1990-cı yılın Orak ayın (iyül) 22-dä Gagauz Halkın Üstolan Kongresi 411 oylan (Kongrestä okadar delegat vardı) aldı Karar kurmaa Komratta Milli universitetı. Sora da, 1991-ci yılın Küçük ayın (fevral) 11-dä, bu universitet Moldova devleti tarafından tanındı da, Komrat Devlet Universitetı (KDU) olarak, büünkü gündä 35-ci yıldönümünä etişti.
