Harman ayın (avgust) 19-da Komratta Gagauz Respublikasının, ani kuruldu Gagauz Halkın Üstolan Kongresin kararınnan, kurulmasının 34-cü yıldönümünü baktılar.
2024-cü yılın Harman ayın (avgust) 19-da Komradın baş meydanında tantalalı bir gösteriylän bakıldı Gagauz Respublikasının kurulmasının 34-cü yıldönümünü, angısında lafettilär taa çok onnar, kim Gagauz Respublikasının kurulması için may bişey bilmeer hem o iştä pay almadılar. Bundan kaarä, kutlamanın taa çoyu rus dilindä oldu.
Gagauz Respublikasının kurulmasının istoriyayısını bilmeyennerä deyni, aklılarına getireriz, ani onu kurdu diil iki kişi, ama Gagauziyada yaşayan hepsi insannarın delegatları, angıları toplandılar Gagauz Halkın Üstolan Kongresinä da 1990-cı yılın Harman ayın (avgust) 19-da, halklararası zakonnara görä, bütün dünneyä bildirdilär, ani gagauzlar kurdular baamsız Gagauz Respublikasını ozaman, açan Moldova Respublikası kendi baamsızlıını taa kazanmadıydı. Moldova bunu yapabildi sade bir yıdan sora, açan SSRB daaldı.
Gagauz Respublikasının kurulma kararını aldı Gagauz Halkın Üstolan Kongresinä ayırılan 450 deputatı, ama taa ileri, o Kongresinä ayırılan deputatlar ilktän 1990-cı yılın Orak ayın (iyül) 22-dä 411 oylan Gagauz Milli Gimnasını (laflar – Todur ZANET, muzıka – Mihail KOLSA), Gagauz Milli Bayraanı hem Gerbı kablettilär.
Herliim, büün bizä kahraman hem bilmäm ne kurucu-bobaları gösterilän satkın eriflär 1994-cü yılda, Gagauziya (Gaguz Yeri) avtonomiyamısına kayıl olmaydılar hem Gagauz Respublikasını satılmaydılar o Respublika büün dä yaşayaceydı. Şindi sä avtonomiyamızı da kaybederiz.
