Harman ayın (avgust) 18-dä Kongaz küüyündä büük şenniklän hem tantanalıklan açıldı “GagauziyaLand” dinnenmä hem şennenmä parkı, angısını adadıydı yapmaa şindiki Gagauziya Başkankası hem onun komandası.
Parkın açılışına katıldılar diil salt kongazlılar hem Gagauziyadan insannar, ama Moldovanın başka erlerindän, ölä nicä Basarabka, Çimişli, Kantemir, Kaul, Kauşan, Leova, Taraklı hem başka kasabalar hem rayonnar. Belli ki, o insannarın çoyu gelmiştilär kendi uşaklarınnan hem unukalarınnan.
Lääzım urgulamaa, ani “GagauziyaLand” parkını kuran adamnar açıkladılar, ki hepsinä deyni buradakı atrakționnar hem türlü konkursalar parasızdır hem kuruldu o, bakmadaan ana-boba gelirlerinä, herbir evlada kolaylık olsun deyni uşaklıının hem şenniinnin dadını almaa.
“GagauziyaLand” dinnenmä hem şennenmä parkın açılışında bildirildi, ani tamojnedä varmış taa atrakționnar, angılarının Moldovaya girişindä şindilik zorluk çekiler.
“GagauziyaLand” parkın ofițial açılış şiridini kestilär: Gagauziya Başkankası Evgeniya GUȚUL, Gagauziya Halk Topluşu Başı Dimitriy KONSTANTİNOV, Moldova Parlamentının deputatları Vasiliy BOLÄ, Marina TAUBER, Aleksandr SUHODOLSKİY hem Kongaz küüyün primarı Mihail ESİR.
