Türk İşbirlii hem Koordinaţiya Agenstvosunun (TİKA) yardımınnan Gagauziyanın “Çemrek Film” studiyası başa çıkardı “Güneşä karşı” ilk gagauz hem gagauzça multii yapılmak proektın 1-ci bölümünü.
2022-ci yılda anılmış gagauz kultura insanı Vera SİBOVAnın teklifinä görä hem TİKA tarafından kabledelän 22 multi (çizgi filmı) gagauzçaya çevirmäk proektı 2023-cü yılda saaselem başarıldıydı. Ama uşaklara izmet etmäk bu yol ansızdan eni bir proektlan ilerledi – ilk gagauz hem gagauzça “Güneşä karşı” multiin yapılması.
Vera SİBOVAnın önderciliindä 2023-cü yılda kurulan “Çemrek Film” studiyası becerdi bir yılın içindä bu gagauzların adetlerini hem sıralarını gösterän “Güneşä karşı” multiin 1-ci bölümünü başarmaa hem geçennerdä, ona romınca subtitra yapıp, dünneyä baaşlamaa.
Kutluca olsun!
