Baba Marta ayın 7-dä Moldova saalık ministerliin haberinä görä, koronavirus, ofițial olarak, Moldovaya da etişti.
O günü İtaliyadan eraplannan gelän bir Moldova vatandaşlıykası KOVID-19 hastalıın simptomnarınnan bolnițaya alındı. Taa sora da analiz gösterdi, ani bu insan koronavirus salgınına ulaşık. Hasta olan insan İtaliyada bolnițadan kaçmış. Onun büünkü durumu pek aar.
Moldova saalık minesterlii bildirdi, ani hasta insan İtaliyadan gelmiş Boloniya-Kişinev reysınnan da o reyslan gelän yolcuları hiç biri karantina alınmamış.
Taa sora, Moldovanın eski saalık ministrusu Alla NEMERENKO, uyandırıp büünkü Moldova saalık ministrliini, açıkladı, ani hasta insan İtaliyadan gelmiş Milan-Kişinev reysınnan.
Alla NEMERENKO danıştı Moldova saalık ministerliin işçilerinä bölä laflarlan: “Saygılı ministerliktän kolegalarım, uyanın da alın başka devletlerin taktikasını, ölä nicä komşu Romıniyada. Pnevmoniyaylan olan hastada vardı üüsürük hem başka klinika simptomnarı, da eraplanda ona yardım edän insannarda hem pasajirlarda var büük risk ulaşmaa o hastalaa. Lääzım Milan-Kişinev reysının hepsi yolcuları nekadar tez yazıya alınsınnar hem kontrol edilsinnär.”
