Baba Marta ayın 31-dä hem Çiçek ayın (aprel) 1-dä Gagauziya Başkankasına Evgeniya GUȚULa karşı Kişinevda taa iki sud oldu, da Canabisini taa ötää dä Evrupa İnsan Hakları Sudun (EİHS) tarafından insan onuruna aykırı olan Kişinevun № 13 kapanında brakmaa kararı ortadan kaldırılmadı.
Bu iki suda da Gagauziya Başkankasını Evgeniya GUȚULu suda 14 kişilik polițiya konvoylarınnan getirildi.
Moldova kuvedin, yustițiyasının hem daavacılıın işini şüpä altına koymadaan, insannar bir şaşılacek işä maana bulêr – Gagauziya Başkankasını Evgeniya GUȚULu suda 14 kişilik polițiya konvoyunnan getirmäk bu nedir: Korumak mı? Korku mu? Proțedura mı? Gagauzlara, Gagauziyaya hem vatandaşlara merkez kuvedin kuvet göstermesi mi? Osa başka bir annaşılamayan saklı iş mi? Bu soruşlara herkezi kendisi cuvap versin.
Bu durumda eridir aklımıza getirmää gagauzların bir lafını: bir sürü koyuna bir çoban köpää eter, bir islää insana bir sürü köpek etmäz.
Bu sudlar karar aldılar, ani prokurorların Gagauziya Başkankasına Evgeniya GUȚULa 30 günä ön arest altına almaa istedikleri yannış. Ama 20 günnük arestı da ortadan kaldımadılar.
Evgeniya GUȚULun advokatları Baba Marta ayın 28-dän Kişinevun Çokana bölümü sudun Gagauziya Başkankasını Evgeniya GUȚULu 20 günä kapanda ön arest altına kapanmaa kararını ortadan kaldırmaa deyni Kişinev Apeläțiya Palatasısına apeläțiyaylan danıştılar.
Çiçek ayın (aprel) 2-dä bu danışma Kişinev Apeläțiya Palatasısında incelenecek.
Gagauziya Başkankasına Evgeniya GUȚULun arestından beeri Kişinevda sudların önnerindä hem Gagauziyada durmamayca protest mitingları geçerlär.
