Orak ayın (iyül) 17-dä Gagauziyanın Çadır, Komrat hem Valkaneş kasabalarıda Moldovada gazın paasının hem onun ardına hepsi paaların büümesinä karşı protest mitingları geçti, nereyi bindän zeedä insan çıktı.
Mitingçılar urguladılar, ani son bir yılın içindä Moldovada ekonomika hem cümne durumu ölä düştü, ani artık yaşamanın kemiinä bıçak dayandı. Baarıp “Moldova Pravitelstvosunu erä!” hem “Maya SANDUyu erä!”, mitingçılar acıylan söledilär, ani bu insannarın beterinä bu kertää geldik hem, ani Moldovada paalar hem tariflar taa üüsek oldular, nekadar komuşu Ukraynada, neredä cenk gider.
Biri-biri ardı nasaat edän insannar istedilär Moldova pravitelstvosundan Rusiyaylan insannara uygun olan eni gaz kontraktı yapsınnar, yakıttan tamojnä vergilerini kaldırsınnar hem paaları belli bir uurda tutsunnar.
Komratta olan mitingta teklif edildi Kişineva gidän yolları kapamaa hem “Kişineva gidip, Parlament hem Prezidentura binalarına akışmaa, ama bişeycik orada kırmamaa”.
Çadır kasabasındakı mitingta teklif edildi “insannarın soruşlarını çözmää deyni Halk Komitetı kurmaa”.
Mitingçılar çaardılar Moldovanın başka kasabalarından da insannar mitinglara çıksınnar, çünkü paaların büümesi dokundu diil salt Gagauziya insannarına, ama bütün Moldovaya, onuştan “bekleeriz bizi işitsin Taraklı da, Basarabka da, Kaul hem başka kasabalar da”.