2015-ci yılın Kırım ayın (dekabri) 21-dä Makedonyanın “21 Aralık Türkçe Eğitim günü” (“21 Kırım ay Türkçä Üürenmäk Günü”) ofiţial yortusunun kutlamalrınnan ilgili olarak, bu devletin Üsküp (Skopiya) başkasabasında çeşitli yortulu kutlamaklar yapıldı.
Ofiţial kutlamaların çerçevesindä oldu birkaç kultura hem bilim toplantıları, angıları TİKA (Türk İşbirlii hem Koordinaţiya Agenstvosu) hem MATÜSİTEB (Makedoniya Türk Ţivil Kuruluşları Birlii) katkılarınnan hem Yunus Emre İnstitutun ortaklıınan yapıldı.
Kırım ayın (dekabri) 20-dä Üsküpün (Skopiya) Buşi otelindä Türk dünnäsı poetların buluşması hem peet avşamı oldu. Avşamda peetleri okudular Makedonya, Türkiye, Kosova, Romıniya, Moldova (Gagauziya), Ukrayna poetları. Kırım ayın (dekabri) 21-dä Aleksandr Palace otelindä “Türkçenin Balkannar için önemi” türkologiya konferenţiyası oldu. Bu sıralarda pay aldı gazetamızın baş redaktoru, poet Todur ZANET ta.
Hep o günü avşam üstü Üsküpün (Skopiya) Boris Traykovski sport salonunda yortunun ofiţial toplantısı oldu, angısında 10 bindän zeedä insanın arasında pay aldılar Makedoniyanın Premyer-ministrusu Nikola GRUEVSKİ, Türkiye Respublikasının Başbakan Yardımcısı Yalçın AKDOĞAN, Makedoniyanın Devlet Bakanı Furkan ÇAKO, TİKA Başkanı Serdar ÇAM, YTB (Yurtdışı Türklär hem Akraba Topluluklar Başkannıı) Başkanı Kudret BÜLBÜL, TİKA Balkannar hem Dou Evropa Daire Başkanı Mahmut ÇEVİK, büükelçilär, deputatlar, bilim adamnarı hem yazıcılar, dernek başkannarı, üüredicilär hem üürencilär.
Makedonyanın “21 Aralık Türkçe Eğitim günü” (“21 Kırım ay Türkçä Üürenmäk Günü”) yortusu başarıldı büük bir konţertlän, angısını gösterdi Türkiyedän estrada artistı Mustafa CECELİ.
